ثورة الرمان

سبق وأن كتبت عن عدم اقتناعي بيوم 25 يناير ك"ثورة" وذلك لعدم تشويه  معنى الكلمة في اذهان الناس حال عدم نجاحها بالقدر المرجو,

 ولكن........بعد  كل مارأيت من جهود لانجاح اليوم, شعرت  بوجوب المشاركة, مهما حدث.....المشاركة لمجرد المشاركة, لحشد اعداد , لأن العدد الكبير سوف يشجع كل من توجس من بطش الامن.... 

خلاص كده..

كفاية نحوي...

الكلمتين اللي حيلتي خلصوا.... 

اديلي في الشعبي..الكلام السلس الشيعبي بتاعنا...الواحد بينطق كزكرتين بالضالين.... تيجي أنت تقولي توجس واقشعرت ابدانهم؟  

ماشي يابن عمي...

25 يناير مش ضروري يبقى يوم ثورة, و مانحملش اليوم فوق طاقته... الخروج بكرة حيبقى عشان اللي خايف مايخافش...اللي متلجلج, يتنحرر لما يلاقي كله نزل وينزل معاهم عملا بواحد من المبادئ التالية: " يا نعيش عيشة لوكس, يا نركب كلنا البوكس", أو "ضربوا الاعور على عينه .." أو....وده المحبب لنفسي جدا ومنطقي الخاص في التعامل مع الامور المستعصية, ألا وهو " ياللا يا رمان" ...

لو ثورة تونس كانت ثورة الياسمين,  أنا عايزها في مصر تبقى ثورة الرمان...

وبرضه, بكره مش نهاية المطاف... 

بكره بداية...

الناس تنزل بأعداد...

بكره ماجابش نتيجة؟ ننزل بعد بكره... بعد بعده... لحد ماييجي اليوم المنتظر....

البرادعي مش نازل؟  بذمتكم مش مكسوفين وانتم بتقولوا كده؟ 

البرادعي لو نزل الشارع حيبقى نفر زيه زيكم...اطلع فوق سطوح عمارة وبص كده وقابلني لو فرقت البرادعي من جميلة اسماعيل...

محدش حيقف يوزنه ويقولك ده مهم وده مش مهم.... 

كل واحد في الشارع في اليوم ده دوره زي دور البرادعي بالظبط ويمكن أكتر....

الاخوان مش نازلين؟

 هما مش نازلين كمؤسسة, بس نازلين كأفراد... زي ماشباب من الوفد و التجمع نازلين....

ومش بعيد نلاقي ناس من الحزن الوثني الظلمقراتي نازلين برضه... اينعم انضمامهم في حد ذاته يصمهم بالنفعية, بس برضه جزء من المجتمع اللي بقاله 30 سنه بيتضرب تحت الحزام...

اسمحولي اضرب مثال من الحياة, الجبل بيقع في الطبيعة بطريقة من اتنين... 

يا إما يضربه تسونامي يساويه بالارض.... 

أو سرسوب ميه صغنتت يفضل ينز عليه يوم ورا التاني ورا التالت لحد اليوم المليون, حيعمل شرخ والشرخ حيسرح... والنتيجة واحدة...

لو شبهنا ثورة تونس بتسونامي, مش شرط نبقى زيهم, ممكن نبقى سرسوب,...يعني في الحالتين الأمل موجود...واحنا نعمل اللي علينا, ولو ماشفناش النتيجة النهارده, اولادنا إن شاء الله حيشوفوها...

هما خايفين منكم أكتر ماانتم خايفين منهم! والله العظيم.... 

عشان انتم أصحاب حق.... انما هما عارفين انهم بيدفعوا عن واحد حيبيعهم في غمضة عين ويسافر السعودية يعمل عمرة مع بن علي...

بص عالخريطة اللي تحت دي, عارفها؟ 

دي خريطة وعلم بلدك...اللي ياما شافت وبرضه صامده...ياما تم احتلالها ونهبها, وبرضه بتدي.... وحتفضل برضه بعد احنا مانمشي.....

.ومصر مش نهاية المطاف... بعد مانحرر مصر لسه ورانا مسئوليات تانية... فلسطين على رأسها...ويتبعها العالم العربي بأكمله....

الحق معانا, والبلد بتاعتنا, والمستقبل لازم يجيلنا, وياللا يارمان

ياللا    يا   رمان