Thursday 30 December 2010

وقفة للتضامن مع اهلنا في تونس

الكل مدعو للمشاركة في وقفة يوم الأحد القادم الموافق الثاني من يناير 2010 في تمام الخامسة مساءا بتوقيت القاهرة. للتضامن مع أهلنا واخوتنا في تونس الخضراء  والتنديد بأعمال بينوشيه بن علي . 

وسيسقط كل الجبابرة والطغاة
لستم بأقوي ولا أعظم ممن سبقكم
البقاء لنا وأنتم ذاهبون 
إلى حيث تستحقون 
إلى مزبلة التاريخ

وطن عربي واحد
شعب واحد
لسان واحد
قلب واحد
هم واحد
والفرج قادم


Tuesday 28 December 2010

ستي نزاكه ومفجر ثورة التفجير وعبكمال والأقزام السبعه


النهارده القنابل نازله ترف من كل حدب وصوب...
يا دين النبي...
اييه ده يا رجاله؟
في يوم واحد يا مؤمن ألقى السيد مفجر ثورة التغيير خطاب تاريخي..
وقبله كان السيء وزير التعميه والتكدير بيأمم مدارس في اسكندريه ..بلد المحبوب..
وجه أخينا عبكمال رقعنا مقال عن جيمي والعظماء الخمسه..و أنا في انتظار مقاله الجاي عن جيمي وصولجان الملك المسروق..ويتبعهم لغز عز ومقعد البرلمان المختفي...

كل ده أنا عديته..مش حقولكم بمزاجي عشان كده يبقى كدب..وزي ما احنا عارفين إن الكداب بيروح المجلس.....بس لظروف صحية وبحاول اتجنب البواسير...
بس تطلع ستي أم لواحظ دي تقول الترجيع الخزعبلي  اللي قالته ده في 90 دقيقه؟ أهوه ده اللي لا ممكن ااابداا!!!
قالت إيه الوليه؟ تعالوا نستعرض..
اسمع يابني لعلك تستفيد.....
قاال إيه...الولاد بتوع الكليات النظريه مايروحوا يشتغلوا أمن في منشآت خاصة...وسوبر ماركو..لأ لأ. اسمها إيه دي..مولات...الكلام ده ليه؟ عشان حسب اخر احصائيه إن اقل مرتب في مول كان 800 جنيه...
لأ من فضلك...امسك مناخيرك وبلاش الأصوات الاسكندراني دي..احنا في مكان شبه عام وفيه بنات...وفرها لبعدين...
وبعد كده إن مفيش مشاكل يخلص الكليه عشان الوجاهه الاجتماعيه وبعدين يعلق الشهاده ويشتغل أي شغلانه..وده إيه..طبقا وتعليمات المفدى..مفجر ثورة التفجير ومجدد ثورة التجديد...السيد اسم النبي حارسه وصاينه..السيد أمين السياسات اللي جابتنا ورا..السيد.......قولوا أنتم عشان مش عايز اوسخ المدونة هنا .....
الراجل قال إيه..إننا لازم ندور على طرق أخرى ونفتح مخنا ونشبرق المسائل عشان تنعنش وتبرعش وتبقى آخر طعطعه! ماشي..أهوه الشباب ايام زمان كان بيقول مفيش مانع مؤقتا لحد ماتيجي فرصة..انما يبقى ده الطبيعي؟ ياخي...لفظ بذيء!

ثقافة مجتمع...هي ثقافة مجتمع....وجاهه اجتماعيه...والدليل قالوله!
وشوف الوليه بتستدل بمين...بتستدل بـهاني هلال وزكي بدر...يعني جت تكحلها عميتها...وخلاص بقى محدش يفتح بقه من هنا ورايح لما يعرف إن فيه 80 طالب في الفصل..ماهي مش فارقه..اخرهم إيه يعني؟ شعراء؟مبدعين؟ لا يا حمص..اخرهم أفراد أمن في منشآت خاصة

يعني البلد لازم تبتقسم نصين...نص دكاتره ومهندسين وصيادله .. والنص التاني أفراد أمن في منشآت خاصة...

طيب يا ست..فيكي الخير إنك فتحتي عينينا على الحقيقه والمستقبل المشرق المضيء...
أنت يابني منك له...لو لسه في ثانوي وأدبي..اعرف إنك فرد أمن في منشأه خاصة بـ800 جنيه في الشهر...
متقعدش بقى تجعلص المسائل وتقولي اطور ومش اطور...فسي دماغك...انسى يا عمرو...ستك نزاكه قالتهالك اهيه...
وأنت يا عم الحاج يا أبوالواد الفاشل ده..بدل ماتشقى وتداين نفسك عشان دروس الواد المفعوص بتاع ادبي ده اللي اخرته فرد أمن في منشأه خاصة...خدها من قاصرها ووديه جيم عشان يربي البنش والبايسبس والترايسبس يفيدوه لما يشتغل فرد أمن...

وأنت ياعم الأستاذ في أي كليه نظري من اللي بتخرج أفراد أمن..سيبك بقى ومتاكلش دماغ العيال بكلام فارغ...دول اخرهم أفراد أمن في منشآت خاصة..يعني متبقاش حنبلي..واقلب كله ني في ني  عشان العيال تتخرج وتاخد الوجاهه الاجتماعيه وبعد كده تشتغل أفراد أمن في منشآت خاصة..ولو حبيت تفيدهم بجد..علمهم كلام من نظام "اوعى يغرك جسمك يا كابتن"  لزوم الشغل..

وأنا من هذا المزنق أحب أقول لكل شاب وكل فتاه..لاتنحرف..ولو عمك خد منك عقد الشقه غصم واقتدار..بوس ايدك شعر ودق وطنش خالص وروح اشتغل فرد أمن في منشأه خاصة..
بس عشان مبقاش ظلمتها..كويس إنها وضحت انه في منشأه خاصة..عشان لو كانت قالت منشأة عامه..كان عارفين بقى اسمه إيه؟ غفير

طب سؤال قليل الادب مني ولو فيها اساءه يعني لمعاليكي...حنجيب محامين منين؟ وكلاء نيابه..محاسبين..اداريين...مدرسين..وباقي الحاجات اللي بتخرجها الكليات النظريه..هاه؟حنستوردهم؟
ده يا حاجه إذا كان المهندسين في شركات البترول كان بيتقال لهم "اللي مش عاجبه يغور وأنا أنزل القهوه اجيب 10 يشتغلوا مكانك" والكلام ده من خبره شخصيه واللي قال الكلام ده كانت رئيسة مجلس ادارة احدى شركات البترول ..
بس على رأيك..إذا كان المهندسين العشره منهم بجنيه...طبيعي خريجي الكليات النظريه يتمسح بيهم البلاط..
وده منعا لسوء الفهم مش نظره دونيه من العبد لله لخريجي الكليات النظريه..بس كنت باضرب مثال...

نيجي بقى لنقطة الموضوع ومربط الجحش ...إن ستي نزاكه اللي قالت الكلام ده طبعا لازم تكون معاها تسعه دكتوراه وميه وعشرين ماجستير ولا نهايه بكالوريوس في علوم الفضاء..أيييوان...زي ما انتم بتقولوا دلوقتي..انتم عارفين أكتر مني..
ستي اطاطا معاها دبلون..وفي رواية أخرى اعداديه..وفي قول آخر إنها ابتدائيه...
طب يا وليه يا كلبوظه إنتي يا قرشانه...لما اللي معاه ليسانس أو بكالوريوس من كلية نظريه يشتغل فرد أمن في منشأه خاصة..امثالك من المتسربين من التعليم يشتغلوا إيه؟أنا عن نفسي..رأيي الشخصي تشتغلي في البيوت..هناك مش حيبقى فيه كسوف إنك تبوسي إيد الست الهانم لما تعطف عليكي وتديكي هدوم البيه الصغير لحد من عيالك..
بس جه في عقل بالي دلوقتي وظيفه أحسن...عارفه إيه؟ وزيرة القوى العامله..ايوه..اييه..مستغربين ليه؟ ماهو بالمنطق المعكوس اللي عايشين فيه ده أمثال المزمزيه ديه لازم ينط فوق ويوصل عشان تفضل عينها مكسوره طول عمرها ومتفكرش تعمل حاجه تفيد البلد...ويوم ما ربنا يكرمها..تسفر شحنة خادمات لاخواننا الخلايجه...ماهو كل واحد بيعمل اللي يفهم فيه..
أمال انتم يا حاقدين يا عملاء عايزينهم يجيبوا مين؟ زويل؟


هنا لا يحضرني الا كلمات واحد من بتوع الستينات والزمن الكخ البيبي اللي لازم نتخلص منه تماما بتاتا خالص مالص بالص...
الراجل قال: "التعليم يجب ان يصبح كالماء والهواء"..الله يرحمك يا عبد الناصر!


وكما عودناكم..اللي قرا لازم يسمع عشان يتحرق دمه زياده..آدي حوار ستي نزاكه في 90 دقيقه..
وتحته مقطع شهير جدا ليها يوضح مدى شموخها واعتزازها بكرامتها ...وهي بتبوس إيد الهانم الكبيره..أكيد كله شافه..فضلة خيرك يا هانم..طابخين النهارده مفتقه..آه يا ولاد المفتقه

واستأذنكم أنزل أنا بالتتر عشان حفظي بعد مااتفرج عالحلقه قام رامي عدة الشغل في خلقتي وقاللي حياخدها من قصيره ويلحق يقدم في سيتي ستارز...فرد أمن في منشأه خاصة!









Sunday 26 December 2010

أبانا الذي في مصر الجديدة..شكرا

أبانا الذي في مصر الجديدة ...تمجد اسمه...

نشكرك على انجازاتك...
نشكرك على مجهوداتك ...
نشكرك على سهرك الليالي كي تقر اعين الرعية..
نسبح بحمدك ونفتخر بك رئيسا لنا
أثقلنا الحمل على ظهرك ...
تكاثرنا ولم نراعي ظروفك الماديه
لم نعي كلامك حينما قلتها صريحه "أأكلكم منين؟"
مافهمناش إن البلد مفهاش 3 ابيض و إنك بتصرف علينا من جيبك الخاص...
بقالك بتصرف علينا 30 سنه من تحويشة مصروفك
اتحوجت قدام العالم المتحضر بسبب جشعنا وفراغة عيننا
اضطريت تبيع الغاز للصهاينه عشان تأكلنا...
احنا وحشين..
احنا قلالات الادب..
نستاهل ضرب مية صرمه يا شيخ...

عارف لو كان الكلام ده بعد 5 ولا 10 سنين حتى؟
كنا قلنا إن الكلام ممكن يجب فايده..
انما بعد 30 سنه؟
لا يلدغ مؤمن من جحر 30 سنه...

واعترافا منا بجميلك...


وتقديرا منا لشقيانك معانا...
خد دي سلي بيها صيامك...


آه....استنى استنى...لو الفيديو مشتغلش عندك... ممكن تتسلي في الكتاب
و دي الصفحة الأصلية لجمعية التغيير للبرادعي

مع تحيات  شعبك الخسيس ....

فاصل ونواصل

بقالي فتره مش قادر أكتب أي حاجه...سدة نفس؟ مش لاقي حاجه اتفاعل معاها وأكتب؟ مع إن فيه مسودات كتير محتاجه شوية تنقيح وتخلص...بس يظهر الاحباط وصل لتحت الباط!!

حتى حفظي واخد اجازه وبيزور أمه في البلد...
والتتر برضه واخد اجازه...
كده يبقى أنا اللي حنزل بدل التتر...

وعيد ميلاد سعيد.. وسنه جديده سعيده..وعيد قمح سعيد...وأي حاجه سعيده برضه...المهم يبقى فيه أي حاجه تفرح أو ليها معنى...


Wednesday 8 December 2010

لحد كده وكفايه!

الناس إيه مسكتها؟ الناس إيه خارسها؟

في إيه؟ 
واحد تاني يتقتل؟
ايييييه؟
ايييه؟

مستني لما عيالك يتخطفوا من ايدك ويتعدموا العافيه قصاد عينك؟

مستني واحد يغتصب مراتك أو أمك أو أختك وأنت واقف ماسك الفوطه علشان ده حكومه؟

الناس مخصيه؟

لو القتل مش كفايه...يبقى إيه اللي كفايه؟

دم مصطفى مش في ذمة الحكومه وخنازير العادلي...

دم مصطفي في رقبة اللي وقفوا يتفرجوا 
اللي شافوا ابن منطقتهم بيتقتل وهما واقفين بيعرصوا


بالظبط زي دم خالد سعيد و كل اللي زيه

اللي حصل مش أول مره...
وأكيد مادام ده رد فعل الناس مش حيكون اخر مره!

دم كل دول في رقبتنا....
و اللي بتصلي وتدعيله كل يوم حايسألك عملت إيه علشان تدافع عن اخوك ابن آدم...

الناس بتتحجج انهم مش قادرين يعملوا حاجه لفلسطين علشان المسافه...
طب ده فين؟
ده حصل فين؟ في سيبيريا؟


وآدي لينك تاني
وآدي التدوينة عند نواره نجم 
وآدي صورة مصطفى الله يرحمه!

دي مش دعوة للعنف..
دي دعوة لاسترجاع كرامتنا المهدره كآدميين..
حد فاكر الكلمه دي؟
ولا 30 سنه من ازهى عصور الحريه خلتكم تنسوا؟

Sunday 5 December 2010

لا جديد

مش عارف ده  امساك فكري ولا احباط بعد مذبحة الانتخابات و ويكيليكس ....
كده ولا كده...نفس النتيجه...