حلاوة زمان...عروسة، حصان

موقف غريب حصللي النهاردة وأنا رايح أشتري حلاوة المولد...

جبت السودانية والسمسمية و الملبن و الحاجات دي وفكرت عشان أعود أولادي على روح العيد اني أجيبلهم حصان وعروسة...
ماعلينا..دخلت على صف العرايس لقيتهم كلهم مبعجرين و شكلهم مايسرش  ....قلت بلاها العروسة..أركز في الحصان... لقيت كل الحصنة اللي موجودة أنيل و متقلصة كأنها كلها بقت أقزام...
في العادي باطنش ومش باركز في الحاجات دي وعادي يعني سولعوا..مش عاجبني مش حاشتري.. انما المرادي تملكني الفضول فندهت الواد صبي المحل وقلتله ايه اللي عاملينه ده؟ مفيش ذمة خلاص؟
الواد بصلي واتفجع وطلع يجري نده لصاحب المحل...الراجل جه وقافش بس قلت برضه طز حاقول اللي في نفسي...

ايه ياعم اللي عاملينه ده؟
اييه يا أستاذ؟ مالك ؟ داخل بتجر شكل ومش عاجبك حاجة...
ياسيدي مش كده..أنا جاي وناوي أشتري عروسة وحصان للعيال تقوموا سادين نفسي بالحاجات دي؟ فين أيامنا ياعم كان الفن والتلوين والنسب وكده...

طب مالهم دول يا أستاذ بس؟ مش عاجبينك في ايه؟
تعال ياعم..ده منظر حصان؟ الحصان يبقى جتة كده ومالي مركزة ومنفوش.. انما ده رجله قصيره و نسبه بايظة..انتم غيرتم القوالب امتى؟
آااااه..مش تقول كده؟ لا يافندي الحصان راحت عليه..الموضة السنادي سيسي...
*صمت*
*بيضحك*
*صمت*
*لسه بيضحك*
هي بقت كده؟ طيب....
*بيبص وضبه مفشوخ*
طب والعرايس دي مالها مبعجرة ليه كده؟ كلهم بكروش؟
كروش ايه بس يا أستاذ؟
أمال ايه ده؟
حبلى بنجمه...
*صمت*
*ضحكة أعلى من الأول*
*صمت*
*نفس الضحكة ماخلصتش*
*باتدور وأمشي وباضرب كف على كف*
*لسه بيضحك*

Houston, we have a problem

عمرك تخيلت نبني أول صاروخ مصري؟
أحمد بهجت تخيل في تحتمس ٤٠٠ بشرطة... ونظرته كانت واقعية جدا...
لكن ده كان زمان..مصر اتغيرت...واحنا اتغيرنا...الثورة قامت..وأسقطنا النظام..ودلوقتي احنا حنبقى قد الدنيا..عشان هي أم الدنيا...

ماعلينا... تخيل أننا أطلقنا الصاروخ (ماتصدعناش بالتفاصيل) وخير اللهم اجعله خير تليفون جه للقاعدة ورائد الفضاء قال الجملة المشهورة "هيوستن، وي هاڤ أ پروبلم" (ارجع للملاحظة اللي فاتت) تخيل الرد حيكون ايه....

١- Houston, we have a problem
ربنا معاك يابني...قدها وقدود...

٢- Houston, we have a problem
جربت تطفي الصاروخ وتشغله تاني؟

٣- Houston, we have a problem
ماهو من نجاستك ومشيك البطال..

٤- Houston, we have a problem
كلم أمك وقولها تدعيلك..

٥- Houston, we have a problem
سميت قبل ماتطلع بالصاروخ؟

٦- Houston, we have a problem
لو كنت ركزت في الطريق مكنش حصل اللي حصل...

٧- Houston, we have a problem
وأنا يعني ماوراييش غيركم؟حالاحق على مين ولا مين؟ اتفضل خد دورك في الطابور يا سيد

٨- Houston, we have a problem
لو تحجبت النساء لسلك طريقك إلى السماء...

٩- Houston, we have a problem
قول ورايا الشهادة...

١٠- Houston, we have a problem
يخرب بيتك لحقت تبوظها؟ دانا لسه مصلحهالك الأسبوع اللي فات..

١١- Houston, we have a problem
مانت أصلك فقري، مش وش فضاء..

١٢- Houston, we have a problem
المكنة برة الضمان وحنعمل مناقصة صيانة ..

١٣- Houston, we have a problem
الجيش بيقولك اتصرف..

١٤- Houston, we have a problem
ابقوا خلوا الثورة تنفعكوا

١٥- Houston, we have a problem
ايه ده، بجد عطل؟ فين؟ ابقى تعال وأنا أقولك فين...

دارث ڤيدر يعبث بالمقدرات...

بقالي كام يوم مش عارف آجي عشان مفيش نت في البيت ولا عالموبايل...وأول لما أرجع أتخبطت في وشي بصراع العمالقة بين "زابايضار" و "أبلة فاهيتا" ...لا ويخش في المعركة الفنان البورصجي سامح أبو برايز كمان....

حرام عليكي يا ماسر اللي بتعمليه في ولادك ده...

كالعادة مش عارف أركز عشان أكتب أو أحلل أو أنظر واعمللي منظر*(اقرا تحت، لحست كلامي)... لكن حاجة واحدة اللي شاغلاني وعايز أعرف نتايجها...ياترى قد ايه من الناس العادية اللي حتشوف الصراع ده حتصدقه وتهتم وتشغل بالها ويبقى ده جزء من نقاشهم اليومي ويعملوا دكتوراهات في سيرة أبلة فاهيتا وبلد منشأها وتاريخ صلاحيتها؟

حاجة تانية بخصوص اللي نازلين جلد للناس عشان ولعهم بنظرية المؤامرة...حضرتك احنا ناس اتفرجت عالأستاذة نادية الجندي في أفلامها وشفراتها الفشيخة من نوعية "خالتي بتسلم عليك" .... ولو جينا للجد فنفتكر ملحمة "الطريق إلى إيلات" و كلمة السر كانت افتتاح صوت العرب بأغنية "بين شطين ومية" .... 

بجد انت جاي تتكلم في ايه؟!

طب بعيدا عن صراع المخابرات ونبيل فاروق و ن-١ و يد٢-أ .... حضرتك ماقريتش لناس فشيخة زي "د.جمال حمدان" في "شخصية مصر" و ازاي ان الجغرافيا والتضاريس و سهر الليالي خلوا مصر مطمع؟ (مطمع دي فكرتني برسوم العبقري مصطفى حسين وهو بيصور مصر بلدنا - اللي عالترعة بتغسل شعرها - في صورة ست لابسة جلابية ومنديل و حلق بدلايات) ... واحنا كمجتمع شرقي متدين محافظ فيه المرأة حرام وعورة وغلط و كل الشباب النجس عينهم عليها عشان ياخدوا منها غرضهم ويقضوا وطرهم و حتى مايدولهاش منديل تمسح بيه زي الأستاذ غسان السوري ماعمل في كابتن سمية الخشاب في المخزن في "عمارة يعقوبيان"...

كل ده ومستغرب ان الناس مدمنة ل ومؤمنة ب"نظرية المؤامرة الكونية"؟

خلاص بقى...هزرنا وضحكنا ولعبنا....كفاية كده... جه وقت التهريج....
اسلمي يامصر انني الفدا.....ذا يدي إن مدت الدنيا يدا...

*كتبت في الأول اني ملقيتش وقت أحلل و أنظر وأتفلسف..لكن لقيت الكلام سرح وعملت اللي قلت مش حاعمله...ياللا بقى..ربنا يسامحنا...جت عليا أنا يعني؟