ونرجع نقول....إيه النيز؟

تحديث: 2011-03-25 , البوست ده كتبته أكتر من أسبوع قبل قيام الثورة...وزيي زي أي انهزامي  نظرت وفقرت وقلت إزاي يعني  تقول لواحد أنا جاي أطلع عينك يوم كذا؟  ونرفزتي جت من احباطي..يعني خفت لا قدر الله إن العصابة تقمع الناس وتجيب ضرفها ويبقى اضافة تانية لاحباطات الناس! وساعتها قلت يارب أكون غلطان... كل كام يوم أضيف تحديث وأقول إن شاء الله أكون غلطان...وأخيرا يوم 27 يناير اتأكدت إني غلطان :) وكانت أول مرة أفرح بغلطي :) ....
جيت بعد الغير مأسوف على خلعه ما غار في داهية...لقيت سكة التخوين بدأت....قلت استنى يا واد...ييجي واحد متحمس زيادة ويقوم راقع كلمتين مالهمش لازمة..ولا حد من النخبة العاقلة تقولك ده كان  بيفقر فيها وهاتولي المقصلة...
آه قلقت..وكسكست كمان...والإعتراف بالحق أبلة فضيلة...الواحد سمع كلام وقت الثورة مالوش أي لازمة من نظام اللي ايده في المية مش زي اللي ايده في **** (مشيها النار عشان الاداب العامة) وأنت وأنت وأنت وأنت والكلام اياه... 


ودلوقتي اتكسفت من نفسي...حنرجع للكسكسة تاني؟ اللي عايز يفهم يفهم...واللي مش عايز..بناقص! 
عنها يا سيدي...وقلت لنفسي ياللا يا رمان  وححط البوست تاني وإنشالله ماحد حوش...

__________________________________

تحديث : 27-1-2011

الحمد لله الحمد لله الحمد لله....ه

 أنا كنت غلطان... الحمد لله الحمد لله...ه

 الرجالة مش ساكتين...ه

الناس بتقوم...ه

  يارب....يارب...يارب... 

________________________________________________

تحديث : 19-1-2011, لو وانت بتقرا, حسيت إنك مش موافق أو معترض عاللي باكتبه, أو قرفان مني, يبقى من فضلك اقرا البوست  ده  عشان تفهم موقفي  ...اتفقنا؟ أكيد؟ كلام رجالة؟ طيب يا سيدي...سمي وخش برجلك اليمين..

__________________________________________________

تحديث :17-01-2011 : يا رب اطلع غلطان ويوم 25 يجيب نتيجة...حبقى فرحان قوي إني غلط وهما صح..المهم نوصل لنفس النتيجة اللي كلنا عايزينها ...وبرضه تعليقي مازال قائم إن لما الموضوع يحصل, اختيار المسئولين يبقى أحسن من 1952...ايدي على قلبي وبقول يارب!ي

________________________________________________

البوست الأصلي: 16-01-2011

منظر خارجي, كافيه في سيتي ستارز... 

يدخل علي على الشلة  وتك تك تك تك سلام عالكل...

علي: إيه الاخبارات يا شباب؟ 

الشلة: تماام اللوز... أنت إيه النيز؟

علي: تظبيط يا معلم, كانت طلعة جامده النهارده

الشلة: طب بقولك,   يوم التلات (الثلاثاء) الجاي طالعين  سخنة (العين السخنة) عند أحمد قبل ابوه مايروح يفرش هناك... إيه الكلام؟ دايس؟

علي: عيب يا بوب..أنت بتقول إيه؟ أساسي!

الشلة: طب الحق حطها عندك عشان أنت دماغ اهلك مفوته وحتنسي!

علي: اوعى! (علي بيطلع البلاك بيري) حاحطه في الكالندر ونديله واحد سينكرونايز لزوم الزهايمر....اوووووبس!

الشلة: إيه؟ خير؟

علي: التلات بخ... الشباب عالفيسبوك عاملين ثورة وكده يوم التلات 25... شكلي حقلب...

الشلة: لا يا عم, مش ضروري, احنا نظبط ونطلع الثورة وبعد مانخلص نطلع سخنة....هاه..حلو كده؟ 

علي: بيس ...

(النهاية)

الخلاصة...محدش يفتكر إني بتريق على مبدأ الثورة...قبل ما واحد يطلع فيها ويقولك ده موالس وقابض وشغال معاهم والحبشتكنات بتاعة اخواننا اللي بيتحمقوا بسرعة...

غاية ماهنالك إن الدعوة اللي طلعت على فيسبوك لثورة يوم 25 يناير (عيد الجلادين) كانت مضحكة بشكل هستيري وتقريبا كنت على وشك اني افقد سيطرتي على عضلات المثانة واسيب الليلة سبهللة...برضه, ماعلينا...

هو فيه إيه؟ الناس اللي عايشة عالفيسبوك شكلها نسيت الدنيا عاملة إزاي! 

يعني إيه تحط  "ايفينت" Event وتقول حنعمل ثورة؟

والله خليتوا شكلنا وحش قصاد العالم المتحضر 

والغير متحضر

الكلام ده مفهوم في حالة تنظيم سري مثلا زي ايام 1952 والضباط الاحرار ...انما ثورة وتغيير من الشعب على فيسبوك؟ لا بجد..قولوا حاجة غير دي

ومحدش يقولي 6 أبريل... حكايته بدأت مع غزل المحلة..... 

الله يرحمك يا محمد يابو عزيزي...الراجل زمانه في تربته دلوقتي بيضحك ضحك السنين...

التوانسة ماقعدوش عالانترنت  يقولك ياللا يا شباب ياللا نبيبسي...

التوانسة لقوا واحد منهم, زيه زيهم اتاخد منه أكل عيشه...ولع في نفسه... خلاص..ماعدش فيها كلام... هو النهارده ايش عرفني أنا مش حبقى مكانه بكرة؟

انما ناس صحابنا؟ انسى يا عمرو...اضرب السايب يخاف المربوط والسايب... فتاة العتبة للي فاكرها...اعتدوا عليها في ميدان عام... خالد سعيد اتقتل قصاد شارع بحاله...وشرحه مصطفى اللي برضه اتقتل في اسكندريه على مرأى ومسمع من شارع بحاله...

30 سنة من ازهى عصور الحرية خلوا الناس تقبل أي حاجة...واللي يقوللي الضغط يولد الانفجار...أقوله عشان كده سايبين هطل برامج التوك شو زي العاشرة مساءا و 90 دقيقة والغثيان ده .... واحزاب زي الوفد الله يرحمه والتجمع وما شاكلهم من الأحزاب الكرتونية! ويقولك الحزب الوطني خد 420 مقعد بس في مجلس الشعب..المنافسة كانت حامية... آه صح... حامية جمال! ده عند امه يا ادهم

حلل الضغط بتاعتنا منفسه عشان كده الاكل مش بيستوي.......

واللي يقولك المصريين ماوصلش بيهم الحال زي تونس اقوله بمنتهى الثقة  "خد" ....ايوه..أصل ده استفزاز يعني... اللي عمالين ينتحروا عشان مش لاقيين ثمن الاكل ومصاريف العيال.... واللي صعب عليه حاله وقتل عياله ومراته قبل ما ينتحر...و اللي كان من اوائل دفعته اقتصاد وعلوم سياسية واترفض في التعيين عشان والده "مزارع" وشنق نفسه على كوبري... يعني عالملأ يا ناس.....حد فاكر عمارة يعقوبيان؟ { ابوك شغال إيه يا طه؟ موظف يا فندم...ايوه موظف إيه يعني؟ حارس عقار يا فندم...بواب يعني.... طيب اللي بعده....} 

واللي مقدرش يتجوز وقام جايب سكينة وقاطع لامؤاخذه عضوه ...واللي بيتساقطوا واحد ورا التاني زي الدبان في طوابير العيش والانابيب عشان الدعم يوصل لمستحقيه... اقصد الدعك يوصل لمستحقيه...

حد حرك صوبع رجله الصغير؟ واللي حيقولي المظاهرات حقوله لفظ بذيء في وشه...المظاهرات ليها ناسها وهما نفس الوشوش كل مرة...النشطاء بتوع شباب الأحزاب والحركات اللي بدأت تسخن.. والناس اللي بدأت تشارك في وقفات الحداد على خالد سعيد عالكورنيش وزيها وقفة الحداد على ارواح ضحايا كنيسة القديسين...

معلش طولت ورخمت وشتمت وقليت ادبي وكده بس صبرك يا مؤمن...حالخص قبل ماتنام...

تونس فيها ناس قامت وما كانتش بتبص جنبها مستنية حد... كل واحد دخل و مستناش...هوبا بقوا مية...هوبا بقوا ألف... هوبا بقوا بشر ... هوبا قام البوليس يجزر فيهم... هوبا الناس قالت مابدهاش... هوبا كله سخن وياللا يا رمان....

ومش أي "ياللا يا رمان" في 29 يوم فقط لا غير بينوشيه لم غياراته الداخليه في كيس بلاستيك و لف على صحابه من ايام الشقاوة.. وكله الشهادة لله عمل معاه أحلى واجب ندالة وصدرله الحمرا...و مستر اوباما ابن اللئيمه استنى لحد الفرح ما خلص وقام مهني التوانسة...يعني معاهم معاهم..عليهم عليهم... وفرنسا قالتلك مانعملش عداوة عشان التوانسة مرشقين في كل حته هنا وده كفاية عليه كده, نستني الجاي ونعمل معاه واحد صحوبيه وطول ماالفرح شغال...

اللهم الا خائن الحرمين الشريفين "مسخر الله وجهه", استضافه وفتحله دراعاته ونيمه في حضنه...نجستوا الارض الطاهره...والأدهى خليتوا زين الفاسقين بن قحبه يروح يعمل عمرة!!!! أنا اسف بس مفيش مرة في حياتي لفظة " أحا" كانت مناسبة للموقف وبتخدم الاحداث زي دلوقتي.... هو  ده وقتها! أحا...وفي كيس كمان... هو ده التوظيف الدرامي!

احنا بقى؟ احنا  شعب مسرف بيجيب تكييف وبيدخل عياله مدارس خاصة ويشتري عربيات ملاكي و تليفون بكاميرا وشريحتين...شريحتين يا مفتريين؟ شريحتين؟ طيب...وحياة ابوكوا نفر نفر حتلاقوا عمو عز ولا أونكل نظيف ماسكهالكم زلة ويعايركم بيها في الخطاب اللي جاي....

طب خلاص...اسمع دي....الثورة لما تحصل إن شاء الله مش حتبقى بتخطيط..وايفينت عالفيسبوك...حتحصل من غير ماتلاقي احزاب المعارضه الصورية طالعة زي الجيص تخطف الميكروفون من المذيعين عشان يقولوا احنا اللي قتلنا الحنش... 

الناس اللي في الشارع هما اللي بيعملوا الثورة...آه ممكن ينظمها زعيم, بس بيبقى باختيارهم, مش فارض وصايته عليهم ويقولهم أنتم ماتفهموش مصلحتكم...

عشان كده أنا مش براهن على أي هتش من اللي شغال... مع ايماني الكامل إن التغيير قريب... يوم بعد يوم بيتهيألي إني بفهم وجهة نظر البرادعي واوافقه على طريقته اللي مازالت بتستفز الكثيرين من متعجلي التغيير...

وظني إن توقيعات التغيير والكلام ده إزعاج وانذار للطغاة مش أكتر... الفكرة إن الناس تحس إن ليها دور وتبقى فيه منهم ايجابية واستعداد للخروج....

ومفيش ولا ثورة ملونة ولا مخططة ولا كاروهات....ويمكن حتى مش بطريقة تونس.... 

يوم يطلع الناس في الشارع... زي وقفات حداد خالد سعيد بس على نطاق اوسع بكتير... مفيش شغل...مفيش بيع.. مفيش شرا.... في كل الميادين والشوارع الرئيسية... يتاخد باستخفاف ...اليوم يطول يبقى يومين...تلاتة ....اربعة... المهم الصمود...

وساعتها... شنطة السفر اللي فيها الغيارات ومزيل العرق كام كيس شيبسي حتبقى في الطيارة ومتجهة للسعودية..أو تل ابيب (مش فارقة كتير..محصلين بعض) ...

وتوته توته...فرغت الحدوته... بايخه وملتوته...

تعليق: كل أملي إن لما التغيير يحصل...نتعلم من درس 1952 و الزبالة ماتتسابش تمسك مناصب ونيجي كمان 58 سنة من دلوقتي نلاقي السعودية عاملة ثورة ويطلع شباب من مصر يعملوا ايفينت عالفيسبوك (أو اللي حيكون موجود كمان 58 سنة, مثلا اتصال telepathy) ويقولك منها لله الثورة المباركة بتاعة 2011 ...فين أيام الرئيس مبارك, كان الدولار بـ 5 جنيه وكان كيلو الطماطم بـ 10 جنيه والناس كانت بتشتري تكييف وبتدخل عيالها مدارس خاصة وبتجيب تليفون محمول بشرحتين و.....................................................