الكلمتين دول بمناسبة الپوست بتاع حسام السكري النهاردة عن الشاب اللي مات زي الحمار عشان مياة دخلت في ودنه و قبله الخبر عن الدراسة اللي بينت أن الأطفال اللي بيتعلموا تعليم ديني كتير في صغرهم بيبقى صعب عليهم يفرقوا بين الحقائق والخيال لما يكبروا...
الكلام ده رجعني سنين كتير ورا....لما كنت في مدرسة بدر الاسلامية بنين في جليم في اسكندرية...
في ابتدائي واعدادي الواحد اتعلم حاجات من العينة دي كتير قوي...
الله يسامحك بقى يا أستاذ عبدالعزيز السهيلي...
حكالنا مرة أن ازاي بروس لي كان بيعبد الشيطان وهو اللي اداله "قوى خارقة" و في الآخر الشيطان قتله والدكاترة معرفوش سبب وفاته أو كانوا مخبيين عشان الناس ماتعرفش ...
وحكاية تانية لما طلع بونبوني بطعم الفواكه اسمه "توتي فروتي" على اسم الأغنية و اعلانه كان التيمة بتاعة الأغنية... حكالنا أن الأغنية دي "توتي فروتي...أووه رووتي" دي عبارة عن صلاة للشيطان و كتبها إلڤيس بريزلي اللي برضه كان بيعبد الشيطان واداله نجاح وشهرة وفلوس وسخره لنشر الصلاة دي... وكان محموق قوي وهو بيقولنا أننا ازاي حمير عشان حفظنا التيمة بتاعة الاغنية\الاعلان وقاعدين نرددها زي الهبل.... وكل الفصل طبعا نزل استغفار وكان متأثر جدا...
دي عينة من الهري اللي كان بيتملى بيه دماغنا واحنا صغيرين في مدرسة كان مفترض فيها أنها خاصة و بتدرس دين قويم و...و....و....
الحاجات والقصص الصغيرة دي يمكن صحابي مايفتكروهاش لكنها علقت معايا و كانت كل شوية بتنط في ذاكرتي وأنا باكبر وباخبط في الدنيا اللي اتعزلت عنها عزلة وسخة لحد سن ١٤سنة و قعدت ثانوي وجامعة و كام سنة بعدهم لحد ماخدت بالي أن فيه جزمة في دماغي مفروض أنها تشك في كل حاجة لحد مايتضح أصلها لكن دائما التردد والخوف كانا أسياد الموقف...{ماتفكرش كتير في الحاجات دي عشان يقينك مايتزعزعش وايمانك يضعف ويمكن تكفر والعياذ بالله}....(ايه؟ بتبص ليه؟ مانت برضه غالبا فكرت كده في يوم من الأيام) ....
لكن ما أنكرش أني كنت قفل...وناس أعرفها قدروا يتخلصوا من الكلام ده بدري عني... وده من أسباب اعتقادي الشبه دائم في سذاجتي
لكن بارجع أسأل نفسي ازاي كنت حاعرف وأنا صغير؟ ازاي كنت حاعرف ان ده هجص؟ ما كل اللي حواليا كانوامصدقين (ويمكن بعضهم مازال مصدق لحد دلوقتي)... وكل دنيتي اللي قد علبة الكبريت كانت متسقة مع الكلام ده...
هما يمكن كان فكرهم أن الكذب ده اللي حيحافظ على ايماننا وحيخلينا نتجنب أي حاجة وحشة ونفضل متدينين...لكن الحقيقة أنهم ساهموا في تشويه جزء كبير قوي من فكرنا وعقلنا في أحرج لحظات تكويننا الفكري ...
خلقوا كائنات خايفة من خيالها وشايفين أن كل حاجة حرام وغلط لحد ماييجي شيخ فاضل يفتحلنا باب القمقم ناخد نفس ويرجع يقفله تاني..
(الواد ده تخلص من عقدة الأب...سقفوووله)
مين اللي ازاي فين؟
#اوعى_تفكر
#الجهل_نعمة
#االعقل_فاسد_مفسد_يجب_وأده
