قاعد في أمان الله لا بيا ولا عليا...في المطبخ لزوم تظبيط العشا...طقت في نافوخ اسمها إيه دي اللي خلفتني أسمع علي الحجار (منه لله) , قوم إيه....طلع كل اللي في ال " بلاي ليست " من عينة : يا مصري والمال والبنون وعارفة وفي قلب الليل...
يعني مش كفايه زودت الثوم والشطة في الأكل وباين عليا حاحتاج حنفية مطافي في حنكي لزوم الحرقان....لاا......ده حيبقى لسع من فوق وحرقان من تحت...
قصره...قلت احط كلمات "يا مصري" لأن معلش يعني لو قعدت احرت سنتين مش حجيب نص الكلام ده...
"يا مصري"
كلمات : سيد حجاب
غناء: علي الحجار
يا مصري ليه دنياك لخابيط
والغلب محيط
والعنكبوت عشش عالحيط
وسرح ع الغيط
يا مصري قوم هش الوطاويط
كفاياك تبليط
صعبه الحياه والحل بسيط
حبة تخطيط
فتحت باب استيرادك
وصرفت فوق ضعف إيرادك
حلي للخواجه استكرادك
سابك بتقرا في اورادك
وده قشطك ونزل تشفيط
يا مصري ليه دنياك لخابيط
والغلب محيط
والعنكبوت عشش عالحيط
وسرح ع الغيط
ومهولاتي تحب تزيط
ساعة الفرح زغاريط تنطيط
وفي المياتم هات يا صويت
وفي المظاهرات سخن تشيط
وفي الإنتخاب تنسى التصويت
يا مصري ليه دنياك لخابيط
والغلب محيط
والعنكبوت عشش عالحيط
وسرح ع الغيط
وليه بترشي وتتساهل
وتبيع حقوقك بالساهل
تستاهل النار تستاهل
يا غويط ويحسبك الجاهل
ساهل وساهي وغبي وعبيط
يا مصري ليه دنياك لخابيط
والغلب محيطوالعنكبوت عشش عالحيط
وسرح ع الغيط
يا مصري ياللي الغلا عاصرك
والنهب في عصرك حاصدك
قوم للحياة و اسبق عصرك
ولا حاجه حترجع مصرك
الا إن تكون شغال ونشيط
يا مصري ليه دنياك لخابيط
والغلب محيط
والعنكبوت عشش عالحيط
وسرح ع الغيط
يا مصري قوم هش الوطاويط
كفاياك تبليط
صعبه الحياه والحل بسيط
حبة تخطيط
بس كده...ههههاااا ؟ حد له شوق في حاجه ؟؟؟
No comments:
Post a Comment