هل تجوز الرحمه على كمال الشاذلي؟
وإذا رحمه من وسعت رحمته كل شيء , ألي الحق في الغضب؟
ومع استمرار المحاولات المستميته لإيهام الناس ان الأمل في هذه الحياه معدوم ولتنعقد الآمال على الحياه الآخره.... لا تلوموا من يكفر عندما يسمع من يدعوا لامثال الشاذلي بالرحمه
معلش ...بس ولاد ال.... اللي عاملين فيها مندوبين ربنا و منبطحين للي يدفع بيرفعوا ضغطي لما يقولوا الهطل ده!
ومتنساش الناس الغلابه اللي لسة بيصدقوهم ....
دول يعملوا إيه لما يسمعوا كلام زي ده؟يكفروا؟ طبعا لازم يكفروا...ومين يلومهم لو كفروا ؟
أو الأسوأ من كده , انهم يفتكروا إنك ممكن تقضيها بس تطلع تحج وربنا يسامحك في الآخر...
اللي الناس الوسخه دول ناسيينه إن ربنا لما حيغفر, حيغفر اللي عملوه في حقه هو...مش اللي عملوه في حق الناس....
حق الغلابه مش حيروح...
حق الغلابه مش حيضيع...
كل واحد بات يوم في بيته من غير مايعشي عياله....
كل واحد صبح الصبح وقضى يومه شقا ورجع بالعافيه معاه كام رغيف و حبة غموس ويدعي ربنا يباركله...
كل واحد اتلمست كرامته في بلده.....
كل واحد قلبه اتنفض جوه صدره لما شاف حد بيتهان قدام عينيه...
كل واحد شاف حقه بيتاخد وماكانش حيلته الا انه يقول "حسبي الله ونعم الوكيل"
كل واحد كره بلده اللي اتولد فيها وقال دي مش بلدنا دي بلدهم...
أنا مجبتش سيرة اللي ماتوا أو اتعذبوا أو ...أو ...أو.....
حق الغلابه مش حيروح ... وإن ما رجعش في الدنيا...حيرجعه اللي العدل اسم من اسمائه ...
حق الغلابة راجع راجع ...
