خدعوك فقالوا

للمرة العاشرة بعد المليون...تصحيح لبعض الاشاعات القذرة اللي ماليين بيها دماغ الناس عن البرادعي

البرادعي مش ملاك بلمبة نيون على راسه وجناحين ريش فراخ...بس اللي بيطلعوه عليه دي حاجات حقيرة قوي وفعلا من مستواهم

عيد ميلاد سعيد

لو كنت تعرف 

إن رفضك للمهانة وثأرك لكرامتك من شرطية 

 شرطية صفعتك على وجهك في تعال 

لو كنت تعرف ان رفضك هذا  سيكون السبب في تحرير أمم من الاستعباد

لو كنت تعرف أن ما تصاعد من ألسنة لهب من جسدك سيشعل فتيل الحرية العربية

ولو عرف الطغاة ذلك وقتئذ

لأحرقوا تلك الشرطية بدلا منك 

ولجعلوك ترد لها الصفعة صفعات

ليس ثأرا لكرامتك لا سمح الله

ولكن ليحتفظوا بعروشهم

وليكملوا مسيرة الطغيان

وليكنزوا

ويورثوا لذويهم من بعدهم

ولكن حمدا لله أنهم لم يعرفوا

_______________________________________________

يحتفل مئات الملايين اليوم بعيد ميلادك السابع والعشرين

لو كنت بيننا لرأيت حب الناس لك

لو قدر لك النجاة من الحريق لاحتفلت معنا

ولكن.....نحسبك جميعا في مكان أفضل

حر..ثائر لكرامتك...ورمز لتحرير أمة

أمة نامت وغطت وسخر العالم من إذعانها وخنوعها

حتى حسبوا العبودية فيهم طبعا

_________________________________

طارق الطيب محمد البوعزيزي 

رحمك الله

_________________________________

في ذكرى ميلاد محمد بوعزيزي (29 مارس 1984 - 4 يناير 2011) ه

Wikipedia    ويكيبيديا

Chain Of Command

Making your way through life....
And before you label it "disgusting", take a look around you and you'll surely notice how abundant it is in our daily life!

ذكريات

افتكرت دي من أيام المظاهرات 

الله يرحمهم جميعا.

بعد كل ده...والناس دلوقتي بتتخانق وتقسم التورتة...

أمك حتقلع الحجاب يابو سوسو

استكمالا لمسلسل "غطيني وصوتي يامه" ....الاستاذ  بيشرح الليبرالية كما ينبغي

لأ..وفاهم وواعي ودقرم يعني

نسمع ونشوف ونتعظ...علنا نستفيد....اسمع يا مؤمن....اسمع...سمعت الرعد في ودانك

غزوة الصناديق

غزوة الصناديق...أما أنك راجل ابن حلال بصحيح 

أصحاب البدع كمان؟ ونصر؟ وعيد؟

و "نعم" بقت الدين؟؟؟ وأنصار الدين هما اللي بيقولوا نعم؟

طب يا سيدنا أنا قلت لأ..وبقول لأ..وحقول لأ...كفرني يا عم أنا في عرضك

ونسمع كلامك في اللي تقوله حتى لو خالف المنطق

الجهل نعمة...الجهل نعمة...الجهل نعمة

كانوا في التحرير - شكرا لعمر طاهر

ده مقال اليوم بقلم عمر طاهر في "المصلحجي اليوم ",  برضه عشان أحتفظ بيه للزمن, قلت أحطه هنا

و ده الرابط للمقال  من المصلحجي اليوم 

وده نص المقال :

_____________________________________________________________

كانوا فى التحرير   بقلم   عمر طاهر    ٥/ ٣/ ٢٠١١

هل ستصدقنى إذا قلت لك إننى خلال الـ«١٨ يوم بتوع الثورة» التقيت فى التحرير بكثيرين لم أكن أتوقع أن أراهم هناك؟ رأيت مجدى مهنا يطالب الشباب بالثبات على موقفهم ويدعم مطلبه بكشف أسرار لم نكن نعرفها عن فساد النظام السابق، رأيت يوسف شاهين يتفحص وجوه الثوار لاختيار واحد يصلح بطلا لفيلمه الجديد «هيه ثورة»، رأيت الكابتن ثابت البطل يدير أحد مداخل الميدان ويقوم بنفسه بتفتيش المارين إلى الداخل، رأيت عاطف الطيب يتأمل شاباً ثورياً أسمر انسالت دموعه تأثرا بإحدى الأغنيات الوطنية التى كانت تبثها إذاعة الميدان، رأيته يقترب من هذا الشاب ليصافحه ويحتضنه، ثم رأيته يبتسم عندما اكتشف أن هذا الشاب هو أحمد زكى. رأيت الدكتور محمد السيد سعيد يراجع مع الثوار بيانهم الأول ويعيد ترتيب المطالب حسب أهميتها، رأيت محمود السعدنى يشرح لشلة من الأولاد والبنات الأخطاء التى وقعت فيها ثورة يوليو حتى يتفادوها فى الأيام المقبلة، رأيت بليغ حمدى وقد انتحى جانبا بعوده يضبط أوتاره وإلى جواره فؤاد حداد يملى عليه كلمات أغنية جديدة تقول «ولا شهيد إلا وتمنى.. لو إنه شاعر ثم لو غنى»، ثم توقفا فجأة عندما بدأ السيد النقشبندى يؤذن لصلاة العصر، ظل الشيخ الغزالى والشيخ الشعراوى (يتعازموا مين اللى يصلى بالناس) حتى اقترب أذان المغرب فأم الجميع سليمان خاطر، صلينا فى حماية د.يونان لبيب رزق الذى ما إن فرغت الصلاة حتى عاد لجمع شهادات الشباب لتوثيق الثورة. بعدها رأيت سعاد حسنى تقوم بإعداد ساندويتشات الجبن والحلاوة للمتظاهرين وإلى جوارها جمال حمدان يشرح لها كيف تجلى الجزء المشرق فى الشخصية المصرية داخل حدود الميدان، على مقربة منهما كان العالم سليم حسن يقف حراسة على المتحف المصرى. رأيت الكاتب محمود عوض ود.عبدالوهاب المسيرى وهما يؤلفان بين وجهات نظر الطوائف السياسية المختلفة الموجودة فى الميدان، والفنان محيى اللباد يرسم على وجوه الأطفال علم مصر بطريقته وعلى مقربة منه أسامة أنور عكاشة يدخن على باب خيمته ويضع لمساته الأخيرة على الحلقة الأولى من مسلسله الجديد «ليالى التحرير»، وفى الخيمة المجاورة كان الشاعر الفلسطينى محمود درويش يحل ضيفا على رجاء النقاش وقد استلقيا على أقفيتهما من الضحك بينما علاء ولى الدين يحكى لهما عن مغامراته مع الأمن المركزى فى جمعة الغضب. وحده كان د.مصطفى محمود يجلس شاردا يشاركه التأمل فى صمت نصر حامد أبوزيد، لم يقطع صفوهما سوى صوت صلاح جاهين وقد التف حوله الشباب يغنون «واللى هيبعد من الميدان عمره ما هيبان فى الصورة» لا تصدقنى.. هه؟ مش مشكلة، يكفينى أننى قد اقتسمت متعة مراقبة هؤلاء الكبار فى صحبة صديق أحبه اسمه.. خالد سعيد. omertaher@yahoo.com

حملة "سوري" يا مبارك (منقول) ه

البوست ده مش أنا اللي كاتبه..ده وصلني في ايميل من الحاجات اللي كل يوم بتوصل, بس فكرته أقنعتني. 

اللي كتبه مقالش اسمه مع الاسف بس برضه يستاهل تحية :)

_____________________________________________________________

حملة "سوري" يا مبارك

حيث أنه لم يتاح لي الانضمام الى مظاهرة الاعتدار ورد الجميل الى الرئيس مبارك ، وحيث أنني أثق أن الملايين من أبناء مصر (غير المندسين أو أصحاب الأجندات) يشاركونني نفس الشعور، فأقترح الأفكار التالية ليكون "التكريم" لمبارك بشكل عملي:

·         عمل مظاهرة تأييد لمبارك تبدأ من ميدان التحرير وتتوجه لشرم الشيخ لإعادة مبارك الى الحكم محمولا على الأعناق.

·         تقديم اعتدار مكتوب للسيد الرئيس نيابة عن القلة المندسة التي وصلت الى 22 مليون متظاهر خلال الـ 18 يوم السوداء في تاريخنا.

·         المطالبة بتعيين السيد جمال مبارك نائب والسيدة سوزان مبارك "نائبة" للرئيس.

·         جمع حملة للتبرعات من الشعب المصري لتكملة الـ70 مليار الى 100 مليار (هي الـ 70 مليار يعملوا ايه اليومين دول)، ودلك بأن يتبرع كل مواطن بألف أو ألفين جنيه، وعلى المواطن الغير قادر أن يقوم ببيع كليته أو عينه أو أدنه أو أي عضو لا يلزمه، وادا لم يستطع دلك فيجب أن يقوم باشعال النار في نفسه قربانا للسيد الرئيس.

·         اعادة جميع الأوضاع الى ما كانت عليه وأهمها عودة السيد حبيب العادلي الى منصبه مع منحه نوط "السلخانة" من الدرجة الأولى وتعويضه بالقبض على مليون أو مليونان من "المندسين" واطلاق يده للاستمتاع بتعديبهم حتى الموت بالطرق التي تروق لسيادته.

·         اعطاء توجيهات لمجمع اللغة العربية لالغاء بعض الكلمات مثل "الفساد" و"ارحل" و"باطل" تحسبا لأي مظاهرات مستقبلية.

·         اصدار قرار جمهوري بمنع أي شخص من الوقوف وراء السيد عمر سليمان.

·         تسريح الجيش المصري بالكامل واستبداله بقوات من البلطجية الأشاوس المغاوير وانشاء قوات خاصة تابعة له من البغال والجمال والخيول و الحمير ويسمى سلاح الحيوان ويمكن اضافة حيوانات جديدة كالأفيال والكركدن والكانجارو.

·         الاستفتاء على شعار جديد لوزارة الداخلية من أحد الشعارات التالية: "الشعب في خدمة الشرطة" أو الشعب في خدمة أم الشرطة" أو "الشعب مالوش لازمة أساسا".

·         تشكيل وزارة جديدة للردح والأباحة وتعيين السيد مرتضى منصور وزيرا لها مدى الحياة.

·         تعيين الفنانة زينة وزيرة للثقافة والفنانة سماح أنور وزيرة للاعلام

·         قيام حملة مشتركة من أمن الدولة مع السادة البلطجية لتطهير الفجالة من كل الأجندات الموجودة مع اعتقال جميع العملاء تجار الأجندات الدين يمولون من ايران وحزب الله وأفغانستان وأمريكا واسرائيل والسويد والنرويج وكوالا لامبور.

·         اعادة مصانع الحديد للسيد أحمد عز مع تعويضه باضافة جميع مصانع النحاس والألومنيوم والزنك والقصدير وجميع معادن جدول مندليف الى ممتلكاته.

·         عقد صفقة تصدير كل الانتاج المصري من الغاز والبترول والكهرباء والفحم والشمع والكبريت الى اسرائيل بربع التكلفة للمساهمة في تحسين اقتصاد تلك الدولة الشقيقة والصديقة.

·         تكريم السيدة الفاضلة عائشة عبد الهادي التي أعلنت أن تقبيلها ليد السيدة سوزان لهو شرف لها ودلك بأن يتم تنظيم مظاهرة مليونية تحت شعار "أبوس ايديك أوعي تمشي" وأن تحصل سيادتها على شرف تقبيل أيدي وأرجل كل المتظاهرين.

·         اعادة السيد صفوت الشريف الى مهنته الأصلية (أيوه الأصلية خالص) التي يعلمها الجميع.

·         تعيين السيد المفتي على جمعة صاحب فتوى "الغاء صلاة الجمعة يوم جمعة الغضب" المتحدث الرسمي باسم مسلمي العالم وعطاؤه لقب "مسيلمة العصر الحديث".

·         تغيير اسم ميدان التحرير الى ميدان القلة المندسة.

·         القبض على صاحب محلات كنتاكي واعدامه بالخازوق في ميدان "القلة المندسة".

وهدا أقل القليل تكريما لرجلا ليس طالب سلطة على حد قوله ومع دلك بقي فيها 30 عاما بالتزوير وبدون انتخاب،

هدا أقل القليل تكريما لرجلا عاش يدافع عن أبنائه المصريين على حد قوله ومع دلك أمربقتل أكثر من 300 شهيد في مظاهرات سلمية،

هدا أقل القليل تكريما لرجلا أعلن أنه يحارب الفساد ومع دلك سمح للفاسدين أمثال ممدوح اسماعيل وأحمد عز وصفوت الشريف وغيرهم المئات بأن يرتعوا بالفساد في أنحاء البلاد،

هدا أقل القليل تكريما لرجلا عاش-كما يدعى- يدافع عن كرامة مصر ومع دلك سمح باهانة واستباحة دماء وأعراض وأموال المصريين في مصر و العراق والسعودية وغيرها،

هدا أقل القليل تكريما لرجلا عاش - كما يدعى - يدافع عن أمن مصر ومع دلك فرط في أمن مصر المائي في افريقيا وأمن مصر الغدائي ,أمن مصر الحدودي مع اسرائيل،

هدا أقل القليل تكريما لرجلا عاش-كما يدعى- يدافع عن دور مصر الأقليمي ومع دلك بنى الجدار العازل وأغلق المعابر وشارك في تدميرغزة و العراق وتفكيك السودان وكان أول المطالبين ببقاؤه قادة اسرائيل

الميدان

الميدان

عبد الرحمن الابنودي

_______________

أيادي مصرية سمرا ليها في التمييز
ممدودة وسط الزئير بتكسّر البراويز
سطوع لصوت الجموع شوف مصر تحت الشمس
آن الآوان ترحلي يا دولة العواجيز
______________________ 
عواجيز شداد مسعورين
أكلوا بلادنا أكل.. ويشبهوا بعضهم نهم وخسة وشكل
طلع الشباب البديع قلبوا خريفها ربيع
وحققوا المعجزة.. صحّوا القتيل من القتل
______________________ 
اقتلني! قتلي ما هيعيد دولتك تاني
باكتب بدمي حياة تانية لأوطاني
دمي ده ولّا الربيع؟ الاتنين بلون أخضر
وبابتسم من سعادتي ولّا أحزاني؟
______________________
تحاولوا ما تحاولوا.. متشوفوا وطن غيره
سلبتوا دم الوطن وبشيمتوا من خيره
أحلامنا.. بكرانا.. أصغر ضحكة على شفة
شوفتوشي صياد ياخلق بيقتله طيره؟
______________________
السوس بينخر وسارح تحت إشرافك
فرحان بهم كنت وشايلهم على اكتافك
وأما أهالينا من زرعوا وبنوا وصنعوا
كانوا مداس ليك ولولادك وأحلافك
 ______________________
ويامصر قام العليل رجعتله أنفاسه
وباس جبين الوطن.. مال الوطن باسه
من قبل موته بيوم صحوه أولاده
من كان سبب علّته محبته لناسه
______________________
الثورة فيضان قديم محبوس ماشافوش زول
الثورة لو جت ماتبنش في كلام أو قول
تقلب وتعتل في سرية
تفور في القلب وتنغزل فتلة فتلة في ضمير النول
______________________
متخافش على مصر يابا.. مصر محروسة
حتى من التهمة دي اللي فينا مدسوسة
ولو انتا أبوها بصحيح وخايف عليها قوي
تركتها ليه بدن بتنخره السوسة؟!
______________________
وبيسرقوك يالوطن قدامنا عيني عينك
ينده بقوة الوطن ويقولي: قوم.. فينك؟!
ضحكت علينا الكتب.. بعدت بنا عنك
لولا ولادنا اللى قاموا يسددوا دينك
______________________
لكن خلاص ياوطن صحيت جموع الخلق
قبضوا على الشمس بإديهم وقالوا لأ
من المستحيل يفرطوا عُقد الوطن تاني
والكدب تاني محال يلبس قناع الحق
______________________
بكل حب الحياة خوَّط في دم أخوك
قول إنت مين للي باعوا حلمنا وباعوك.. أهانوك وذلّوك
ولعبوا قمار بأحلامك
نيران هتافك تحرر صاحبك الممسوك
______________________ 
يرجع لها صوتها.. مصر تعود ملامحها
تاخد مكانها القديم والكون يصالحها
عشرات سنين تسكنوا بالكدب في عروقنا؟
والدنيا متقدمة ومصر مطرحها
______________________
كتبتوا أول سطور في صفحة الثورة
وهما عُلما وخٌبرا مِداورة ومناورة
وقعتوا فرعون هرب من قلب تمثاله
لكن جيوشه مازالوا يحلمه ببكره
______________________ 
صباح حقيقي.. ودرس جديد قوي في الرفض
أتاري للشمس صوت.. وأتاري للأرض نبض
تاني معاكم رجعنا نحب كلمة مصر
تاني معاكم رجعنا نحب ضحكة بعض
______________________
مين كان يقول ابننا يطلع بنا من نفق
دي صرخة ولّا غنا؟ وده دم ولّا شفق؟
أتاريها حاجة بسيطة الثورة ياخوانّا
مين اللي شافها كده؟ مين أول اللي بدأ؟
______________________ 
مش دول شبابنا اللي قالوا كرهوا أوطانهم؟!
ولبسنا توب الحداد وبعدنا قوي عنهم؟!
همّا اللي قاموا النهارده يشعلوا الثورة
ويصنّفوا الخلق مين عانهم ومين خانهم
______________________ 
يادي الميدان اللي حضن الفكرة وصهرها
يادي الميدان اللي فتن الخلق وسحرها
يادي الميدان اللي غاب اسمه كتير عنه وصبرْها
ما بين عباد عاشقة وعباد كارهة
______________________
شباب.. كإن الميدان أهله وعنوانه
ولا في الميدان نسكافيه ولا كابتشينو
خدوده عرفوا جمال النوم على الأسفلت
والموت عارفهم قوي وهمّا عارفينه
______________________لا الظلم هين يا ناس ولا الشباب قاصر
مهما حاصرتوا الميدان عمره ما يتحاصر
فكرتني يالميدان بزمان وسحر زمان
كرتني بأغلى أيام في زمن ناصر
______________________
شايل حياتك على كفّك.. صغير السن
ليل بعد يوم المعاناة وإنت مش بتئن
جمل المحامل وانت غض
باتعجب إمتى عرفت النضال إسمحلي حاجة تجنّ
______________________
أتاريك جميل ياوطن مازلت وهاتبقى
زال الضباب وانفجرت بأعلى صوت.. لأه
حرضتنا نبتسم ودفعت إنت الحساب
وبنبتسم بس بسمة طالعة بمشقة
______________________

فينك يا صبح الكرامة الّا البشر هانوا
وأهل مصر الأصيلة إتخانوا واتهانوا
بنشتري العزة تاني والثمن غالي
فتح الوطن للجميع قلبه وأحضانه
______________________

الثورة فيض الأمل وغنوة الثوار
الليل إذا خانه لونه يتقلب لنهار
ضج الضجيج بالنِدا إصحى يافجر الناس
فينك ياصوت الغلابة وضحكة الأنفار؟
______________________
واحنا وراهم أساتذة خايبة تتعلم
إزاي نحب الوطن وإمتى نتكلم
طال الصدأ قلبنا ويأسنا من فتحه
قلب الوطن قبلكم كان خاوِ ومضلّم
______________________
أولنا في الجولة. لسّه جولة ورا جولة
ده سوس بينخر يابويا في جسد دولة
أيوة الملك صار كتابة
إنما أبدا لو غفلت عينّا لحظة هيقلبوا العملة
_______________________
لكن خوفي مازال جوة الفؤاد يكْبِش
خوف اللي ساكن شقوق القلب ومعشش
يقوللي مش راح يسيبه
ولسه هيقبّوا وهيلاقولهم سكك وبِبان متتردش
________________________
وحاسبوا قوي من الديابة اللي في وسطيكم
وإلّا تبقى الخيانة منّكم فيكم
الضحكة عالبُق بس الرك عالنيات
فيهم عدوِّين أشد من اللي حواليكم

______________________

Alexandria 11022011

___________

اسكندرية حبيبتي 

____________________

My Beloved Alexandria

:)

11022011

الحمد لله

أول خطوة على طريق الاصلاح تمت 

__________________

اسلمي يامصر  انني الفدا

ذي يدي إن مدت الدنيا يدا

أبدا لن تستكيني أبدا

انني أبغي مع اليوم غدا

ومعي قلبي وعزمي للجهاد

ولقلبي انتي بعد الدين دين

_____________

لك يا مصر السلامة

وسلاما يا بلادي

إن رما الدهر سهامه

اتقيها بفؤادي

واسلمي في كل حين

_____________

أنا مصري بناني من بنا

هرم الدهر الذي اعيا الفنا

وقفة الاهرام فيما بيننا

لصلوف الدهر وقفتي

في دفاعي وجهادي للبلاد

لا أميل لا أمل لا ألين

_____________

لك يا مصر السلامة

وسلاما يا بلادي

إن رما الدهر سهامه

اتقيها بفؤادي

واسلمي في كل حين

_____________

ويك يا من رام تقييد الفلك

أي نجم في السما يخضع لك

وطن حر سما لا تمتلك

والفتى الحر بأفقه ملك

لا عدا يا أرض مصر فيك عاد

اننا دون حماكي أجمعين

_____________

لك يا مصر السلامة

وسلاما يا بلادي

إن رما الدهر سهامه

اتقيها بفؤادي

واسلمي في كل حين

_____________

للعلا أبناء مصر للعلا

وبمصر شرفوا المستقبل

وفدا لمصرنا الدنيا فلا

نضع الأوطان الا أولا

جانبي الأيسر قلبه الفؤاد

وبلادي هي لي قلبي اليمين

_____________

لك يا مصر السلامة

وسلاما يا بلادي

إن رما الدهر سهامه

اتقيها بفؤادي

واسلمي في كل حين
_______________


اقتراح بتعديل جزء من النشيد ليتناسب مع أفعال الرئيس المخلوع
 ليصبح كالآتي:

لكي يا مصر السلامة وسلاما يا بلادي...
إن رمى حسني سهامه..نديهاله في الاجندة..
واسلمي من كل سيس

مش محتاجة

_____________

مش محتاجة كلام

_____________

صورة اليوم

بكل لغات العالم...ارحل..ارحل..انصرف...اشتاتا..اشتوت

يا لزج

________________________________________

الخلطة السحرية... خلطة وندمان عليها

ده المصري يا حسني

تيجي تصيده يصيدك

البس بقى

وائل غنيم

____________________________

قد أسمعت إن ناديت حيا ولكن لا حياة لمن تنادي

____________________________




توضيح: الكلام ده مش مقصود بيه الناس.. مقصود بيه واحد بس...المسئول الأول و الأخير عن الدم اللي سال والخراب اللي بقاله 30 سنه...

شكرا للدبلوماسيين

وكأنهم أبو الا ان يصيروا أقذر من بوليس مبارك 

كنتكني يا معلم

الحمد لله...الخونة العملاء اتفضحوا

اتفرجوا عالكنتاكي

معلهش الأجندات معرفناش نصورها بس الفيديو الجاي إن شاء الله

بيكيا

طيار سابق

رئيس لمدة 30 سنة

استعمال شعب صبور

شعبه يتخلص منه لفقدانه الشرعية

بدم بارد

الفيديو ده كنت حاحطه في البوست بتاع الشهداء..بس ماقدرتش...لازمله بوست لوحده

ده مش مجرد حزن على  شهيد..ده دليل على خسة ووضاعة نظام مبارك

مش حتكلم ولا حفتح بقي

لا تعليق

ورد مصر

تحديث-2 : 6-2-2011: الشهيد بلال سالم 10 سنوات..من شهداء رفح

اضغط للذهاب للصورة

____________________________________________________
تحديث 6-2-2011 : نقلا عن هبة الخولي:

  ﻫﻨﺎﻙ ﻣﻦ ﻳﻨﺎﺿﻠﻮﻥ ﻣﻦ ﺍﺟﻞ ﺍﻟﺘﺤﺮﺭ ﻣﻦ ﺍﻟﻌﺒﻮﺩﻳﺔ . . . ﻭﻫﻨﺎﻙ ﻣﻦ ﻳﻄﺎﻟﺒﻮﻥ ﺑﺘﺤﺴﻴﻦ ﺷﺮﻭﻁ ﺍﻟﻌﺒﻮﺩﻳﺔ

____________________________________________

هم دول العملاء الخونة اللي باعوا حياتهم عشان وجبة من كنتاكي...

فليلحق العار بكل من حاول تثبيط عزيمتهم 

و  ليلعن التاريخ كل من ساهم في تشويه صورتهم 

شعب بأكمله مدين لهم بحريته وكرامته 

ولادي وولادك لما يفخروا بكونهم مصريين, حيكون دم الشهداء دول السبب...

مش عشان مبارك صاحب الضربة الجوية الأولى وأبو المصريين

مبارك بدأ حياته بشرف وها هو ينهيها بعار سيلاحق نسله إلى الأبد إن شاء الله...

ولكن هولاء بدأوا حياتهم  بمحاولات مستميتة لتنشئتهم كفشلة وسطحيين ملهيين بتوافه الأمور

تسابق الجميع للتفنن في وصفهم..شباب الانترنت والفيسبوك والبنطلون الساقط والجيل والماكدونالدز..

شباب  سيس...بياكل سوسيس...

معظمهم  مالوش أي انتماء سياسي..لأنه ما يسمعش عن السياسة ومايعرفش إيه هي الممارسة السياسية..

مش ذنبهم...كله اتربى إن السياسة دي بتاعة الكبار... واحنا لازم نركز في دراستنا ونخلص ولما نبقى كبار  ومسئولين يبقى يحلها حلال

تسأل ابوك شفت المظاهرة؟ ولا مثلا تقول أنا نازل المظاهرة كمان كام يوم عشان فلسطين..يكون إيه رده؟

يابني أمشي جنب الحيط...احنا مش حمل الكلام ده.. هو أنا بدفع دم قلبي و باقطع من لحمي الحي عشان تتعلم ولا تبقى مظاهرجي؟

ولما خلص الواد..حاجة من اتنين..إما انه مالقاش شغل وقعد بياخد مصروف من ابوه  وعينه مكسورة ولو فكر يفتح بقه, حيتقاله لما تبقى راجل وبتصرف على نفسك ابقى اتكلم...
طب واللي اشتغل؟ فكر افتح بقك وحتلاقي اللي بيقولك  يابني اسكت أحسن تاخد تقرير سري وتبات في الشارع..هو حد لاقي شغل؟ حتضيع الفرصة  والمرتب عشان تعمل فيها وطني واللي حواليك يركب عليك؟

طب وبعدين؟

تعاقبت الحكومات , واحدة تلو الاخرى...والهدف واحد...خدمة شخص  واستجداء عطفه للبقاء على كراسيهم

تعليم  تم تخريبه...خدمات صحية معدومه..مرافق؟ عند أم مشمش....... مواصلات؟ يا ضحكك يا حكومة

الناس كلها عارفة إن فيه حاجة غلط..حتى اللي مش عارف إيه هي... برضه متأكد انه فيه حاجة غلط

الشباب دول  هما اللي عرفوا أي حد عنده التباس  فين بالضبط موضع الخلل... مين السبب في الوحل اللي عايشين فيه..

مسلم ومسيحي؟ صلاة جمعة وقداس في نفس المكان

الرصاص مش بيفرق بين  مسلم ومسيحي

بابا  صاحب شركة ولا موظف ولا فلاح ولا حتى بواب

الرصاص مش بيفرق

ساقط ابتدائية ولا معاك ماجستير؟

الرصاص مش بيفرق

كل الكلام اللي قلته فوق ده ارميه من الشباك..ده حشو فارغ

عايز الخلاصة؟ بص عالصورة اللي تحت..

دول كام واحد من اجمالي 300 شهيد سقطوا برصاص الكلبوشومه ومولوتوفه

بص في عين كل واحد منهم 

تفتكر لو ابوك أو اخوك أو ابنك  صورته هنا حتعمل إيه؟

حتعمل  إيه؟

 حترضى بتهدئة؟

دم  دول يتساب 7 شهور عشان    مبارك مايبقاش اتخلع؟

شايفين دم ولادكم رخيص؟

والله العظيم  مفيش قصاص  كفاية فيهم 

مفيش قصاص كفاية

مفيش قصاص كفاية

ومفيش كلام كفاية  يقول فيهم اللي يستحقوه

الله يرحمكم 

وتشوفوا مصر بتنضف  من مكانكم دلوقتي

الله يرحمكم جميعا 

الشهيد بلال سالم...10 سنوات

الاجندة لا تزال في جيبي

خلاص.... من يوم الثلاثاء 25 يناير والاحرار صامدين...

بوليس؟ بخ

أمن مركزي؟ بخين

أمن دولة؟ كان غيركم اشطر

بلطجية؟ عند امه يا ادهم

خيل وجمال ومولوتوف؟ فاكرين نفسكم بتحاربوا المشركين؟ ياخي..لفظ بذيء

المهم...الناس صبرت, واستحملت...وحتى لما فئة من الناس فجأة اكتشفوا إن مبارك يبقى ابوهم الحقيقي وانهم ولاد حرام والدموع نزلت كالانهار...الناس ماكسكستش... الكسكسة يعني ضياع كل شيء..كل الجهد..الاحلام...الحرية...

وكله الا الحرية...اللي يذوق طعم الحرية مرة, صعب قوي يتنازل عنها...صعب قوي...

ميدان التحرير اللي بقى جبهة الامل رقم 1,  بالاضافة لكل شوارع مصر اللي الناس بتتظاهر فيها...

ميدان التحرير استحق اسمه... ومهما افتى المنبطحون, اللي بتحصل دي ثورة شعبية..مش فئوية..مش ثورة جياع...الشباب اللي موجود من كل الطبقات... من كل الاعمار...من كل الاديان...

محدش شاف واحد مسلم بيروح بعيد عن واحد مسيحي ويقوله حرام الإختلاط , في كل الزحمة دي محدش سمع عن تحرش جنسي (اللهم الا من كلاب مبارك أثناء الهجمات) هه ......

في كل الزنقة دي, المصري غزل برجل حمار... كل حاجة استعملها عشان يعملها خوذة لحمايته...من أول الزجاجات البلاستيكية مرورا بالكرتون وانتهاء بالجردل  والحلة وقصعة الاسمنت :) يخرب بيت دماغك يا شيخ... 

حتى اللافتات والشعارات برضه مصري من الدرجة الاولى.... "مبارك طير انت" و "ارحل بقى ايدي وجعتني...من شيل اللافتة"  وانتهاء باللي رفع اللافتة بالمقلوب, ولما سألوه ليه, قال بقالي أسبوع رافعها عدل ما مشاش, قلت  اقلبها يمكن يفهم كده....

اخواننا بتوع جمعة الفتنة ونحمي مصر والشعارات اللي فعلا تضحك, إن دي بلد الريس العظيم واحنا اولاده...صباح الإحساس باليتم..بنتلزق في الناس عشان يتبنونا...فاكرين يعني انهم لو كسكسوا دلوقتي الراجل حيبقى اخر حلاوة....  حد عمره شاف  كلب جريح؟  مش حيرحم حد! وديه مش بلده...اللي يقتل اهله وناسه بالطريقة دي مايبقاش مصري...ولا يبقى إنسان...

نيرون وهتلر وموسوليني وجنكيز خان واتيلة  وكل السفاحين في انتظارك تنور معاهم مزبلة التاريخ ...اذهب غير مأسوف عليك....وسيطالك القصاص اينما هربت... 

ومن مزنقي هذا بعيد جسديا عن الاحداث على بعد كام ألف ميل...زيي زي أي مغترب ما عرفش انه مصري غير لما سابها... مقدرش غير إني اطلع الاجندة بتاعتي اللي تثبت إني عميل واسعى بكل جهدي لزعزعة الإستقرار  والعبث بالمقدرات والمكسرات وكافة اصناف الياميش جمعاء...

الاجندة لا تزال في جيبي