مصر النهارده

لا يا معلم...مالوش علاقة بالبرنامج اللي أتحفنا فيه خريي رفضان وتشامر أمين على مدى فترة عنيفة انتهت برحيلهم غير مأسوف عليهم زي عمك ميكو المقيم حاليا بشرم ......دي رؤيتي الشخصية للوضع في مصر بعد الثورة....ه

الفرق (جمع فرقة) في منها اللي قديم ومتودك ....وفيه منها اللي لسه مولود نونو وبيحبي...وفيه اللي كانوا موجودين بس اتولدوا من جديد 

نستعرض؟

ملحوظة: كل الصور اللي هنا بعدسة  العبد لله

1- المتصارعون على الجيف

همهم ياخدوا أي حاجة والسلام.... ومعاهم اللي هانت عليهم عشرة السنين و لما وقع الأسد العجوز  فرتكوا جثته عشان  سلامتهم الشخصية.

2- المتلونون 

شغال وعلى كل لون يا باتيستا...موالي ماشي..معارض ماشي... عاش الملك..مات الملك..  ودول امثلتهم لا تعد ولا تحصى

3-الأسد العجوز

حد ينساه؟ هو أينعم  عجز وجاب جاز وكله بيتصارع على رمته...بس مازالت بعض اللبوات بتحاول تنصبه ملك تاني ..حتى ولو منظر..أو شغالين باسمه...وأهو كله مصالح يا عم صالح

4- الحكماء المنعزلين, النخبة  

 برضه  لسه بعيد عن الناس... كل واحد على فرع  وبيهاتي...وفي الآخر يقولك هو محدش بيسمعلنا ليه؟ طب ليه صحيح؟ هه؟ هه؟

5-الحفريات والمنقرضون

ناس أكل عليها الدهر وشرب وانتهوا من زمان..ومازالوا مصرين إن هو ده وقتهم...موجودين أينعم..بس  في فاترينة زجاجية... بلاش نضيع وقت معاهم

6-شايفين كتير قد إيه؟

ودول غير اللي ثاروا وتمردوا ووقفوا في وش الجزارين أيام الثورة....دول اللي ما شاركوش...وخافوا من العصاية...وبرضه العصاية توديهم وتجيبهم....وشوية عشب ولا برسيم  صغيرين يرضوهم وحلو قوي على كده...حد لاقي؟ وبرضه تلاحظ انهم قاعدين "جنب الحيط"..... اديلي في الإستقرار وانا احبك يا فننس

7- عاقدوا الصفقات
ودول  بتوع شيلني وأشيلك....ممكن يتحطوا مع المتلونون  بس حطيتهم هنا لأنهم يبانوا من بره كأنهم حكماء... (ارجع لنقطة  رقم 4) ه

 8- رجال الاعمال
كل واحد جزيرة منعزلة...بيصطادوا فرادى ومالهمش في العمل الجماعي..طول ما الواحد منهم مصالحه ماشية, مش حتشوفه... بس لو فكرت تهوب ناحية  سبوبته أو منطقة نفوذه...عاااو

9- البواسون
ودول مكانهم الطبيعي يبدأ من حيث "ينتهي" الاخرون...حرفيا... يعني رأسه مالهاش مكان غير مؤخرة اللي فوق منه... ماشي في ظله...وأحلامك أوامر ...ودول معظمهم من القيادات الوسطى..يعني اللي مالحقوش يقبوا على وشها بس في نفس الوقت عرفوا يظبطوا حالهم مع اللي فوقيهم ...خطورتهم انهم مازالوا ماسكين سلطة ومش حيسيبوا حد كويس يعديهم..ودول من أهم المشاركين في صنع الفرعون..أي فرعون أيا كان حجمه أو سلطته

10-المتقوقعون

أنا مالي ياعم باللي بيحصل؟ودول ولا هما الحكماء المنعزلين..ولا المنقادين..دول عارفين اللي فيها بس آثروا العزلة وكل واحد رئيس جمهورية نفسه

11- وأخيرا وليس آخرا ...اللابدون في الدرة

ودول أخطر ناس...وأنا مش عارفهم..بس لازم موجودين...سايبين الفريسة عمالة تلعب ولا على بالها..وفي لحظة...همممم يا جمل...وضاع العمر يا ولدي... بس ربنا حيسترها مع البلد...إن شاء الله مش حتروح تاني..ونأبهم حيطلع على شونة