من الإرث المباركي الخالد جملة تلخص فكره وسياسته خلال 30 سنة سواد --> خليهم يتسلوا
الجملة دي تم تطبيقها حرفيا لكن فخامته لم يصرح بها علنا إلا في خطاب افتتاح مجلس الزور في نوفمبر 2010
عايزين حرية يا ريس...اديهم حرية وكام برنامج معارضة على جرنال أصفر لتنفيس الضغط ويسهل التحكم في فكر الناس
عايزين ديموقراطية يا ريس..ياسلام..مفيش مانع, نعمل انتخابات نزيهة ونكسبها
طب فيه ديموقراطية من غير اختلاف في الرأي يا ريس؟ نعملهم كام حزب فض مجالس ونحزمهم كويس وكل واحد ممسوك عليه حاجة تعيبه عشان محدش يعمل دكر ويفلفص
طب ياريس الأمريكان مزمزقين عشان بيقولوا مفيش رئيس غيرك...طب واللهي ما أنا مزعلكم, نعملوا انتخابات رئاسية وبرضه نكسبها...وكله بالقانون يا معلم
......
خلصنا من مبارك خلاص بقى والضرب في الميت حرام؟ ماشي يا سيدي حقك عليا...نتكلم في المهم
اسمع كده وقوللي رأيك: لقد انحاز الجيش لاختيار الشعب المصري العظيم في ثورة يناير المجيدة العظيمة وتحية عسكرية ودول شباب زي الفل
كام يوم وهوب اتفض اعتصام التحرير
حبتين تانيين وهووووب اعتقل واضرب وحاكم نفس الشباب الأبطال عسكريا وضيع مستقبلهم وعذبهم في سجونك الحربية
طب كام أسبوع تانيين ويطلع قياداتك ويحرضوا الناس على المتظاهرين اللي كانوا أمثلة يحتذى بهم وتشكر المواطنين الشرفاء اللي حدفوهم بالطوب وقتلوا واحد منهم
أهالي الشهداء طلعتم عينهم وحسرتوهم على ولادهم لما صرحتم علنا أن مش كل اللي مات شهيد
نفس أهالي الشهداء اتنصبلهم فخ عند مسرح البالون وكانت فضيحة
العدو الإسرائيلي ركعتم شبابنا على ركبه عشان تجرأ وتظاهر عند سفارتهم المقدسة
جه شهر رمضان المعظم وأهالي الشهداء معتصمين في التحرير...فطرتوهم على دمهم اللي سال على وجوههم بعد ما أشاوسكم نزلوا بعصيهم وكعوب بنادقهم على رؤوسهم
وطبعا صلوا المغرب جماعة في عمر مكرم بس كان التكبير عبارة عن سب ولعن من أشاوسكم لأهاليهم وختموا الصلاة في عربيات الترحيلات
بس الحق يعني طلعتم جدعان واخليتوا سبيل "ولاد الناس" عشان كانوا بيعملوا قلق ولهم اتصالات وميديا وطويطر وفيك-بوص ومش ناقصين صداع بقى
كل ده بالتزامن مع العبث المستمر من طرف الحليف الصهيوني على حدودنا وأرضنا اللي عشان نخشها أصعب من دخول أمريكا (سينا..أيوة سينا) وفي الآخر لما قتلوا أفراد من حرس الحدود أو الشرطة أو حفظ السلام أو سميهم زي ما تسميهم...الناس اتسابت تتظاهر عند سفارتهم
هيه وزعيق وهليله وميديا واعتصام وأفراح وانتهت بنزول علمهم ورفع علمنا..مع التحفظ يعني إن ده شيء رمزي مش نصر مادي ولا أي حاجة
وهما برضه الشهادة لله لعبوها حلو, تحفظ واعتراض من تحت لتحت من غير رد فعل بصوت عالي قال يعني اتفجعوا
كلها كام يوم واللي نزل العلم اتعمل معاه الواجب وتكريم في المتداري ووظيفة والناس فرحت ياعيني
طلع واحد ابن حلال يقولك ده نصاب ومارفعش حاجة ولا اتشعلق وأنا اللي قتلت الحنش...والناس دخلت في بعضها ومحدش عارف مين فيه إيه
وأهو كانوا كام يوم وعلمهم اترفع وكأن شيئا لم يكن
خدتوا بالكم إني ماجبتش سيرة ال"مسودة" ؟ أصل المشرحة مش ناقصة قتلى يعني... وأنتم والحق اتجرستم بيها جرسة بشخاليل, واكرام الميت دفنه..وأديني ساكت
الخلاصة, "خليهم يتسلوا" دي مش جملة عابرة, دي منهج وأسلوب حكم تم توريثه زي ما الحكم تم توريثه على عجل لسلطة من اختيار مبارك
بس الجميل في الأمر إن ده برضه شيء مؤقت, يعني كل اللي حصل إن تم وضع الثورة مؤقتا في التلاجة وايهام الناس إن المجلس مؤيد فعلا للثورة ومحتضنها منذ المهد عشان الناس تمشي بقى وتحل عن سماهم وتسيبهم يحكموا براحتهم, ودلوقتي لو حد فتح بقه يبقى ده اللي عميل وضد مبادئ الثورة لأنه بينتقد المحتضن الرئيسي للثورة وحاميها ...ولا إيه؟
خلينا نتسلى....ورانا إيه؟ ورانا إيه؟
----
آه, على فكرة, النهاردة بعد تسريب أجزاء من تقرير مجلس الأمن عن اعتداءات إسرائيل على السفينة مافي مرمرة التركية اللي كانت ضمن أسطول الحرية المتجه لغزة (واللي مصر شاركت في حصارها), رد الفعل التركي كان حاسم وسريع...طرد سفير إسرائيل لدى تركيا, وخفض التمثيل الدبلوماسي التركي في إسرائيل من سفير إلى سكرتير ثان
رجال أفعال, لا أقوال ومسودات و تصريحات مائعة
________________
رحمتك يا رب
________________
No comments:
Post a Comment