خلاصة الكلام #Egypt #Syria #Tunisia #Yemen

من لندن للتحرير ...يسقط يسقط المشير ... #Jul8 #Tahrir #NoSCAF

مش عشان بعيد عنك يا مصر نبقى ناسيينك

دي أجزاء من مظاهرات المصريين في لندن يوم الجمعة 8 يوليو بالتزامن مع التحرير

عددنا يمكن مش كبير...وصوتنا يمكن مش واصل...ومحدش حيعبرنا ده أكيد....لكن.....مش ساكتين

شالوا مبارك جاب شيخ منصر..يسقط يسقط حكم العسكر #UK #July8 

تخاريف #Takhareef

_____________________________________

 وكما قال الحكيم :  "من طلب العلا....ردت عليه مامتها وقالتله: "علا بتذاكر عند صاحبتها يا حبيبي.لما تيجي أقولها مين اتصل؟' " ه

_____________________________________

المواطن مصري

_____________________

إذا المصري يوما أراد الحياة

فلابد عليه أن ينتظر

لحد الكبار مايخلصوا هبش

وتصعب عليه نفسه وينتحر

_____________________

سامحني يا أبا القاسم...مصر مش زي تونس

آلة الزمان ١ #NoSCAF #Egypt

يونيو ٢١٣٠

عناوين الاخبار

____________________

المجلس العسكري في البيان 3912 يحذر من بعض العناصر المندسة و فلول النظام السابق ويؤكد علي اعتزامه الحفاظ علي مكتسبات ثورة 25 يناير ٢٠١١ المجيدة والتي قام بها شعب مصر العظيم ويؤكد عدم رغبته في الاحتفاظ بالحكم وتسليم السلطة مع أول انتخابات شرعية والله الموفق

ابراهيم حسين محمد جمال محمد حسني مبارك مازال في المستشفي لاصابته بواوا في الجيوب الانفية وعدم تجهيز سجن طره لاستقباله ومسئول بوزارة الداخلية يصرح :" لو عايزين حنعملها في مينيت..بس مش عايزين نستعجل العدالة" ه

آلاف المواطنين يحتفلون في قاعة المحكمة بعد النطق بحكم اعدام رفاة وزير الداخلية الأسبق بتهمة غسيل الأموال بعد براءته من تهمة القتل العمد والتعذيب للثوار

وقفة  حاشدة للنشطاء للافراج عن نصف مليون ناشط ومدون بعد محاكمتهم عسكريا

 مانشيت المصلحجي اليوم : "الاقتصاد المصري ينهار والبلد علي وشك الافلاس وأزمة السولار تشتعل " ه

سمير رفعت ضياء رشوان يشدد علي ضرورة الاحكام العرفية واستعمال المجلس العسكري للحزم لاستعادة الأمن في البلاد

الحكومة الانتقاليه برئاسة حفيد د.عصام شرف تتمني وضع دستور للبلاد قبل تسليمها الحكم لسلطه منتخبه

جريدة اليوم السافل تنفرد بحوار مع صاحب فتوى حرمانية اختلاط الأم بابنها 

السعودية تضغط لعدم محاكمة نسل مبارك وتعد بمساعدات قيمتها ٣مليون من النوق الحمر

ونرجع نقول...مش بعيد مادام الموضوع ماشي بالطريقة اللي حاصلة دلوقتي

والناس ساكتة على حقها ومستنية حد يرجعهولها ويحطه على حجرها

الأخ وأخوه...إيد واحدة #NoSCAF

كان مرة فيه اتنين اخوات ماشيين مع بعض في الشارع.....طلع عليهم شلة صيع  ونزلوا ضرب في واحد من الأخوين

التاني سكت خالص ومفكرش حتى يدافع عن أخوه اللي بيتعجن قصاد عينه

بس الشهادة لله..لما العيال الصيع قالوله يضرب أخوه معاهم, قلبه ماطاوعهوش وقالهم لأ

المهم..ربنا قدر صاحبنا اللي بيتعجن ونفخ في صورته وعرف يدافع عن نفسه والصيع هربوا  وصحابنا روحوا بيتهم

  تاني يوم  لما صحوا من النوم الأخ الكبير كان واقف في مدخل الشارع وعمال يحكي إزاي انه امبارح أنقذ أخوه من علقة الموت اللي كان حياخدها وأن لولاه كان زمان الواد يا عيني راح

كل يوم بعدها بدأ صاحبنا يبلطج على أخوه الصغير...مرة ياخد مصروفه ويقوله أصل أنت مش حتعرف تعمل بيه حاجة ولسه صغير...يوم تاني ياخد فطاره ويقوله أنت حتعمل إيه بالأكل ده كله؟ أنا محتاج اتغذى عشان أعرف أدافع عنك لو حصل حاجة

الواد الصغير قال لأ بقى...هو كل شوية كده ولا إيه؟ 

راح لأخوه ولما حاول يكلمه أخوه قام قالب حواجبه ومكشر وعمل غضنفر وانتفض وقال بصوت جهوري : "نعم نعم نعم يا روح أمك؟ ده جزائي إني وقفت معاك وأنقذتك من العيال الصيع؟"  ه

الأخ الصغير : " أنقذت مين يا عم؟ هو أنت عملت حاجة؟ أنت فضلت واقف تتفرج عليا وأنا بانطحن وأنا اللي خلصت نفسي وضربتهم" ه

الكبير: " أما إنك واطي وناكر للجميل صحيح...أنت ناسي انهم قالولي أضربك معاهم وأنا اللي رفضت؟ عشان أخويا...وأنا لايمكن أبيع أخويا" ه

الصغير: "  يعني عشان ماضربتنيش معاهم يبقى كده أنت دافعت عني؟ " ه

الكبير: " طبعا...وتحمد ربك وتبوس ايدك وش وضهر كمان إني معملتش زيهم..." ه

المهم...فضلت الحكاية شغالة كده فترة والواد الكبير عامل فردة عالصغير عشان ما رضيش يضربه مع البلطجية ...بس الحمد لله بعد فترة الواد الصغير  عرف يوقف الكبير عند حده وكسفه على نفسه  ..وتوتة توتة  فرغت الحدوتة..بايخة وملتوتة

حيحصل....إن شاء الله حيحصل ..وإن غدا لناظره قريب

أنت بتستعماني يا كرف؟ #May27 #NoSCAF #scaf

 أيها المواطنون...في هذه الظروف العصيبة التي تمر بها البلاد... قرر الرئيس محمد حسني مبارك تخليه عن منصب رئيس الجمهورية ..وكلف المجلس الأعلى للقوات المسلحة لإدارة شئون البلاد 

والله الموفق والمستعان

الكلمتين دول كانوا آخر حاجة في عهد حسني مبارك ونائبه قفة...وبداية الفصل الثاني من الثورة المصرية... مع المجلس الأعلى للقوات المسلحة

بس قبل مانبدأ لازم نتفق على حاجة عشان مانزعلش, و هالله هالله عالجد..والجد هالله هالله عليه...المجلس  العسكري مش الجيش المصري... زي حسني مبارك ماكانش الشعب المصري ولا أبوالمصريين ...خلاص؟ طيب

في وجهة نظر ناس كتير إن المجلس زق مبارك واداله كتف قانوني عشان بقى عبء عليهم وجاب آخره..بس الاكيد انه مش هو اللي قام بالثورة ومسألة حماها دي فيها كلام لانها مش على اطلاقها صحيحة وفي نفس الوقت مش كلها غلط...واللي مش عاجبه الكلام يفتكر 28 يناير وموقعة الجمل .... كان البلطجية يتسابوا عالثوار وبعدها  يقوموا مرجعينهم تاني.. ليه؟ الله أعلم...بس أهو ده اللي حصل

المهم...جه المجلس وطلع اللواء محسن الفنجري وحيا الشهداء والناس عيونها دمعت وقالت عفارم  يا جيش مصر..وفعلا كان عفارم يا جيش مصر

فضلنا قاعدين  حبه ومين ماسك رئاسة الوزراء؟ عمو شفيق  ومعاه الطود الراسخ...وخد عندك أسامي كتير من الشلة القديمة... يا رااجل؟ امال مين اللي اتخلع ده؟ عم أحمد بتاع الفشار؟


فين وفين لما عمو شفيق  بقى من نجوم التوك شو  وفكر يحترف وهوبا خبط في علاء الأسواني... ودي كانت نهاية فرقة البلوفر المسرحية


جابولنا د.عصام شرف  والناس قالت ياللا بينا الراجل  كان في التحرير يعني شرعيته من التحرير وشالوه على كتافهم شيل


يوم ورا التاني...مممم .... إيه اللي بيحصل ده؟ الراجل ولا كأن له صلاحيات..والناس  بدأت تشك انكم جايبينه وجه حلو تصرفوا بيه المسائل


جت حركة تعيين المحافظين...لقينا الاسماء أسوأ من الاول..وكأن اللي بيختار هو هو اللي كان بيختار في عهد مبارك

جه قانون تجريم التظاهر والاعتصام  واتمرر  على غفلة وصحينا كلنا بناكل شيبسي  وهم المم يا جمل

جه موضوع  احتجاز و "بهدلة" المتظاهرين في المتحف المصري و كشف العذرية على الإناث منهم  وكانت قلم شديد ..ولو مش مقدر مدى المهانة اللي فيها, يبقى معنديش حاجة مؤدبة اقولهالك عشان مانطولش في الكلام


جه فض اعتصامات الميدان واستخدام الشرطة العسكرية  للعنف مع الناس, وشهادات الناس مالية النت وعلى كل الصحف والمدونات..مش أسرار يعني...

جه بقى الكارت الذهبي اللي عمالين يرعبوا الناس بيه...المحاكمات العسكرية...واستهلوا الحكاية مع عمرو عبد الله البحيري اللي دلوقتي تم التصديق على حكم سجنه لخمس سنوات  واحنا قاعدين ...وركز في دي عشان دي مكافئة تماما لموضوع الاعتقالات ايام مبارك, مع الفرق إن ديه عيني  عينك ومحدش عارف يقول"بم"  هه؟


طب واللي حصل مع الاعلامية بثينة كامل ؟  والكلام اللي اتقال عن ثوار الميدان اللي بيقبضوا بالدولار واليورو؟ واللي أكتر من كده؟


زكريا عزمي اتساب في منصبه ولا في مكتبه كام أسبوع لما حد افتكره وطبعا كان كل الورق بخ...والجدع يثبت وآخرها لما خد كفالة 200 ألف جنيه وبعد الناس ماقفشت  قالك لأ ده لسه مايطلعش والنيابة رجعته

ميكو وشوزي فضلوا قد إيه في شرم؟ ولما جه الدور قالك "قلبي..قلبي"  وهو اللي كان قبلها بكام يوم يقولك  "حتى آخر نفس..وأنا ركبي حديد"  و يبعتوا مين عشان يعمل تقرير؟ السباعي  أبولفافة...فاكرينه؟ دم خالد سعيد لسه على ايده


بعدها شوزي لما طلع  قرارها قلتلك قلبي وفشتي وقسطرة وأبصر إيه.. وأول لما الحكاية طلعت فاشوش و خلصتها بـ 24 مليون أهيف, طلعت عادي جدا ولا كأنها كانت بتفرفر في النزع الأخير من كام ساعة

الاسطى مقص دار مفيد بك شهاب  طلع زي الشعرة من قرعته وقعد يقولك طاهر ويا ام المطاهر رشي الملح سبع مرات

جت بقى الحركة الازفت في رأيي ...موضوع تصويت المصريين بالخارج.... يطلع يقولك المصريين المغتربين خلاص تم اقرار القانون.. ويقوم لازقلك معاهم ضباط الشرطة والجيش..وكأنه فيها لاخفيها... ولما الناس قفشت..قالك لأ..دي كل دي إشاعات..وانا أقدر ازعل شعبي حبيبي؟


يطلع مصدر  "مسئول" في المجلس العسكري يصرح للمصلحجي اليوم إن المصريين في الخارج مش حيصوتوافي البرلمانية بس يصوتوا في الرئاسية... و السبب انهم  "لا يعبأوا بالداخل ويمكن التأثير عليهم وشراء أصواتهم" ..يعني أنت بتلطشني على وشي وتقولي أنا مش فارق معايا البلد؟  علشان أنا عايش بره ابقى عميل و أبيع صوتي للي يدفع؟ على أساس إن اللي جوه نزيه وملاك ومفيش جنس مخلوق يشتري صوته بورقة بـعشرة؟ هو احنا نسينا سيد بك مشعل وصوره لما كان بيوزع ال"عيدية" في الإنتخابات اللي فاتت ولا إيه؟ ولا دول كانوا مغتربين برضه؟ وطبعا الكلام ده كله تم تكذيبه وانه لا أساس له من الصحة...ومحدش حتى قال حاجة للمصلحجي اليوم, وهي بدورها أكدت إن الكلام ده جالها من "مصدر مسئول" مش بياع كبدة


وطبعا ماينفعش أفوت زكي قدرة....أبوالسباع...اللي طلعلنا مع يسري يتحدى البلد ويقولنا أنا أمن الدولة جايبني ومش عيب....طبعا اتشال بعدها بحبة بس الموضوع مش راكب...يعني إيه "تم اعفائه" ؟ على أساس انه اتأخر يومين وما مضاش انصراف؟  مفيش تحقيق ولا استجواب ولا يحزنون

طب عميد اعلام؟ واللي عمله في الطلبة..برضه انتهينا انه تم اعفائه
 الا صحيح....هي تم اعفائه دي يعني خد الامان خلاص؟ حر طليق يعني يعمل مابدا له؟ وعفا الله عما سلف؟

طب نقول حاجة عن امبابة؟ عن ماسبيرو؟ ولا إيه النظام؟


ولا اعتزام مبارك القاء خطاب لطلب العفو؟
ولا ...ولا ...ولا


ونختمها بالزغلول الكبير...مظاهرة الشباب عند سفارة العدو الاسرائيلي...ليه؟ السفارة في الدور الكام..وعليها حراسة ولا رئاسة الجمهورية...يعني انسى...يقتحموا مين يا سيد؟ وحتى لما طلعوا, ماطلعوش افراج..لبسوا سنة مع ايقاف التنفيذ...شكرا جزيلا..ده احلى درس في الانتماء وتعميق الوطنية والتفرقة بين العدو والحبيب عند الشباب ده


طب لو قامت حرب بيننا وبين العدو الاسرائيلي...العساكر تقدر تضرب براحتها وتحاربهم؟ ولا يقلقوا عشان ممكن ياخدوا سنة مع ايقاف التنفيذ دول كمان؟


الخلاصة... ايماني بالجيش المصري ثابت...بس المجلس العسكري مش الجيش.. وعلامات الإستفهام كترت بغبا ومحدش فاهم.. وثقة الناس مش مضمونة بالطريقة دي... وصدقوني, الرصيد الآن لا يسمح... لقد أوشك رصيدكم على النفاذ...أنا حلو أهوه وما قلتش لقد نفذ رصيدكم

الناس لو ما شافتش النهارده..حتشوف بكره... ولو ماشفتش بكره حتشوف بعده... مسألة وقت ومش كل شوية تترمى اشاعة وجس نبض ونحدد على أساسها نكمل ولا ستوب

ولا أنتم شايفينا عميان قوي كده؟ هي حصلت يعني؟

 أنت بتستعماني يا كرف؟

الثورة المصرية.. كلاكيت تاني مرة #May27 #Tahrir

دي مطالب المليونية الجاية...الثورة لسه ماخلصتش..كل اللي حصل انهم عزلوا كل الحرامية عن الشعب وحطوهم في سجون خمس نجوم...وكان الله يحب المحسنين 


المهم...مش حارغي كتير...المطالب اهيه... ياريت اللي يقدر يطبعها ويوزعها... الا بقى لو بتحب تنزل على ركبك...
ولو مقدرتش تطبعها...ابعتها لناس صحابك...اللي يقدر على حاجة يعملها...

_____________________________

مليـونية يوم الجمعـة 27 مـــايو

هنـــزل عشــان مش حـاسـس بالتـغـيير، إخواتـي في السجـن والمخـلوع في شـرم

أولا: المطالب الاقتصادية:
وضع حد ادنى وأقصي للأجور.

إعادة توزيع الثروات لإنقاذ البلاد من الأزمة الاقتصادية.

التحكم في الأسعار.
فرض الضريبة التصاعدية.

محاكمة كافة رجال الأعمال الفاسدين ومصادرة أموالهم.

ثانيا: المطالب السياسية:

عودة الأمن بشكل مكثف.

تقديم مبارك للمحاكمة بتهمة الخيانة العظمى، على اثر اعتراف المشير بإعطاء مبارك الأمر للقوات المسلحة بقتل المتظاهرين.
إشراف قضائي وحقوقي على جهاز الأمن الوطني ومحاكمة كل الضباط المتورطين في قتل المتظاهرين وتعذيبهم.

حل المجالس المحلية.
حل جهاز الأمن المركزي أو إدماجه في الجيش.

التأكيد علي حقوق المصريين في الخارج في الانتخابات.
إقالة يحيى الجمل ومحاكمة عمر سليمان.

ثالثا: الحريات:
إلغاء إحالة المدنيين إلى قضاء عسكري. 
إعادة محاكمة كل المحكوم عليهم بأحكام عسكرية بعد تحويلهم إلى المحاكم المدنية.

حظر فض الاعتصامات بالقوة بشكل كامل.

تطهير الإعلام، نريد إعلاما ثوريا معبرا عن صوت الشعب وليس صوت الحاكم أيا من كان.

انـزل وهـات خمسـة معـاك

الجدع جدع والجبان جبـــان 
و إحنا يا جدع راجعيـن للميـدان

تضامن مع اطباء مصر #EgyDoctors

الطبيب لو مش شغال في بيئة سليمة ومتوافر له امكانيات...مستنيه يعالجك إزاي؟ 

الطبيب لو مش بيقبض مرتب يحفظ كرامته..حيهتم بعلاجك ومتابعتك ليه؟ 

الطبيب لو مضطر يشتغل في مستشفى حكومي وبعدها مستوصف ويطبق 100 ساعة, حيبقى فايق لك إزاي؟

الطبيب لو مش قادر يفتح بيت ويصرف على عياله,تقدر تلومه لما يطلب 100ج كشف ومايهتمش إنك مش قادر؟

الطبيب لو بعد 25سنة دراسة واجتهاد وتفوق,اكتشف إن كل تعبه راح اونطة ومفيش مقابل.تلومه انه بيقصر؟

اضراب الاطباء يوم 17مايو لمصلحة المرضي قبل الاطباء

________________________

**** تضامن مع اطباء مصر ****

________________________

حنصوت...مش حنصوت..حنصوت...مش حنصوت

مجلس الوزراء علقني في الهوا وفلق

يطلع تصريح عالصفحة الرسمية يقولك الشرطة والجيش والمغتربين حيصوتوا

بعدها بمفيش... يطلع د.أحمد السمان يقولك الكلام ده بخ..ومحدش قال كده

طب يا د.سمان آدي برينت سكرين للصفحة..والكلام يخرم عين الجمل (المكسرات مش الطود) هااااه؟

شايف الكلام اللي متحوط بالأحمر؟

الصورة تحت اهيه

وكمان تعالى هنا طب الاعتراض كان عالشرطة والقوات المسلحة لاسباب منطقية...ه

انما إيه لسه بيناقشوا قانون تصويت المغتربين ده؟

حنهزر ولا إيه؟

لا ياعم... متفقناش على كده

يعني كده لما رئيس الوزراء يتكلم بعد كده نقول: "يا عمي..أهو كلام ابن عم حديت"؟

ده اللي أنتم عاوزينه يعني؟

نفقد كل ماتبقى من ثقة فيكم؟

أنا عن نفسي معنديش أي مانع...وبيننا وبينكم التحرير والسفارات

بس الواحد كان بدأ يتفاءل خير ..ليه القفش ده؟

وعلى فكرة بقى...الكلام ده ضيع مصداقية صفحة مجلس الوزراء على تويتر

ياللا بقى..انشروا عليها أخبار الفن أحسن انما أخبار المجلس مش حتأكل عيش

أدينا مستنيين...لما نشوف أخرتها

وعلى رأي المثل

"خليك مع المجلس لحد باب القانون"

حواديت-3

_________________________________

وبسرعة البرق .. استل سيفه من غمده و هم أن يطعن عدوه

.........

ولكنه عمل عيشة وقال خلاص النوبة

.........

قام لطشه قلم خدامين وقاله مشوفش وشك هنا تاني ياض 

_________________________________

حكم -4

__________________________________

وما نيل المطالب بالتمني.....ولكن تؤخذ الدنيا على قفاها

__________________________________

Comfortably Numb #PinkFloyd

From their epic "The Wall". A marvellous piece of music indeed.
Might feel a tad bit blue for the happy folk, but...


Music and Lyrics by Waters and Gilmour.
Lyrics attached hereafter

Hello?

Is there anybody in there?

Just nod if you can hear me.

Is there anyone at home?

Come on, now,

I hear you're feeling down.

Well I can ease your pain

And get you on your feet again.

Relax.

I need some information first.

Just the basic facts

Can you show me where it hurts?

There is no pain you are receding

A distant ship, smoke on the horizon.

You are only coming through in waves.

Your lips move but I can't hear what you're saying.

When I was a child I had a fever

My hands felt just like two balloons.

Now I've got that feeling once again

I can't explain you would not understand

This is not how I am.

I have become comfortably numb.

(solo)

I have become comfortably numb.

O. K.

Just a little pin prick.

There'll be no more AHHHHHHHHHHHHH!

But you may feel a little sick.

Can you stand up?

I do believe its working. Good.

That'll keep you going through the show

Come on it's time to go.

There is no pain you are receding

A distant ship, smoke on the horizon.

You are only coming through in waves.

Your lips move but I can't hear what you're saying.

When I was a child 

I caught a fleeting glimpse

Out of the corner of my eye

I turned to look but it was gone

I cannot put my finger on it now

The child is grown, 

The dream is gone.

I have become comfortably numb.

كاميليات -1

____________________________________________________

وكيل النيابة: "إيه يا كاميليا.اخترتي الاسلام ولا المسيحية؟" ه

 كاميليا بعد تفكير تلف وبابتسامة عريضة: "اخترت شيبسي بالجمبري زي كل مصر  " ه

____________________________________________________

وأنتوا كمان حتختاروا شيبسي بطعم الجمبري زي كاميليا..ه

جمع أربع أكياس وابعتهم على صندوق بريد 22308 تخش السحب وتكسب مجموعة شرايط "أمك حتقلع الحجاب يابو سوسو" ه

واحدة ست- حواديت -2

_________________________________

كان فيه واحدة ست...عندها 12 بنت...ه
.........
.........

جوزها طلقها عشان ما جابتلهوش الولد

_________________________________

حكم -3

__________________________________

"من علمني حرفا...قلت له: "كمل،لسه ناقص ٢٧ تانيين 
__________________________________

حكم -2

__________________________________

الخلفة الوسخة تجيب لأهلها اللعنة __________________________________

من أجلك أنت

بسم الله الرحمن الرحيم

 .....بعد الاطلاع على الاوراق وسماع الإيضاحات وبعد المداولة قانونا

حكمت المحكمة بقبول الدعاوي شكلا وفي الموضوع بانقضاء الحزب الوطني الديمقراطي  وتصفية أمواله, و ايلولتها إلى الدولة 

الحمد لله العلي العظيم 

الثورة زمانها جاية

مصر زمانها جاية

جاية بعد شوية

جايبة  اصلاح وحاجات 

جايبة معاها ثورة

فيها نفوس طاهرة

ودم من الشهداء

عارف الواد اللي اسمه مبارك 

جه الشعب وعمله إيه؟

لقى دماغه زي الجزمة 

وسمعته زي الكابينيه

راح مديله مليونية تشيله

عارف عملوا المليونية ليه؟

سرقة ونهب وظلم وقتل

 وعذب شعبه واتريق عليه

وأهو من يومها خلعوه واتبهدل...

واترمى في طرة غير مأسوف عليه

الثورة زمانها جاية

جاية بعد شوية

جايبة حديد وكلابشات

.......

__________________

اهداء لأرواح شهداء الثورة, وضحايا نظام مبارك طوال 30 سنة مهانة وظلم واستعباد وامتهان

بمناسبة اصدار النائب العام قرار حبس مبارك وولاده 15 يوم على ذمة التحقيق في تهم التحريض على قتل الثوار والتربح من المنصب واستغلال النفوذ.  القرار مش حكم محكمة, ولسه الثورة ما انتهتش...بس غمض عينيك معايا واسأل نفسك...لو يوم 24 يناير حد سألك وقالك تفتكر مبارك ممكن يخش  السجن...كنت حترد وتقوله إيه؟ بس كده ..

_________________________________

دي مش النهاية...دي بس البداية

_________________________________

  

ارفع راسك فوق

شعور عنيييف...لا يقاربه أي شعور

حتى يمكن بالنسبالي ما يقلش عن لحظة هروب المخلوع

ربنا فتح عليا النهارده وقلت اتدلى لحد لندن وأروح المتحف البريطاني اللي بقالي 3 سنين جنبه و ولا مرة هوبت ناحيته. قلت أنا كل اللي عايزه من الليله دي أشوف حجر رشيد. حجر رشيد اللي قعدنا ندرس فيه كام سنة في التاريخ وشامبليون وأفلام يا مؤمن.

رحت لقيته محطوط ومتوسطن...كل ده عادي...بس كمية بشر ربنا اللي واقفين فوق بعض عشان يشوفوه...والكلام اللي الواحد عمال يسمعه طول ماهو ماشي في الجناحين بتوع مصر الفرعونية......شعر قفايا وقف من القشعريرة...أو زي مابيقولوا

لحد كده ومعروف يعني... مصر وفراعنة وحضارة...وبلاش نفضل نعيد ونزيد...القرعة حتفضل لحد امتى تتباهي بشعر بنت اختها؟

سبت المتحف ورجلي خدتني شرق لحد ميدان ترافالجار...وهناك بقى اللعب اللي على أبوه. لو متابع الأخبار حتعرف إن نظرا لاستعباط الحكومة وتخفيض الميزانية وتسريح ناس كتير وضرب مصاريف التعليم في 6 وفي نفس الوقت شركات كبيرة بتتروق وتعدي من تحت الرادار وحتى مايدفعوش ضرائب... ف الناس عملوا اتحادات لمواجهة الحكومة وكل أسبوع مسيرات واعتصامات ومظاهرات وتظبيط يعني.  وبرضه البوليس هنا مروقهم ضرب وتلطيش حاجة اوسخ من الأمن المركزي..هما بس شكلهم ابيض ومقطقطين بس ساعة القفش أجارك الله يا مؤمن.......يعني عندهم فرقة احصنة هنا - خيالة يعني- تخصص فض مظاهرات...الحصان من دول تشوفه دبابة تسعة راكب مش زي السفيفين بتوع نزلة السمان اللي محتاجين محلول ست كريمة!

طب ماعلينا عشان عايز أنام...رحت هناك لقيت خيم المعتصمين...طيب عادي...بابص كمان..لقيتلك  أحمر-أبيض-أسود ونسر اصفريكا صغنتت في النص.... علم بلدنا .

الناس مستلهمين روح التحرير...وفعلا منبهرين باللي حصل. ركبني الفخر العنيف ودلدل رجليه كمان.

_______________________________

الخلاصة...إني اتأكدت إن مصر مش بس ماضي (فراعنة)....مصر حاضر كمان (التحرير)ه

والجيل اللي فضل طول عمره بيتمسح في إنجاز الفراعنة...قدر هو نفسه يلهم الناس في حتت كتير

_______________________________

مصر لسه قادرة تلعب في دماغ العالم

شعب مصر.....صاحي...وبيلعب

ارفع راسك فوق...أنت مصري

_______________________________

يا دماغك يا شعب

من ابداعات التحرير يوم 8 أبريل

ثاء ألف راء

____________________________________________________

ثار.... يثور... فهو ثائر

ثار...يثور..ثم هدأ ليعطي حكومته فرصة..ثم يثور ثانية ليحمي مكتسباته ويذكر وينذر بأن الثورة لم تنته بعد....ه

 فهو  مصري

____________________________________________________

لم ولن تنته الثورة...الثورة سكنت قلب كل مصري