الميدان

الميدان

عبد الرحمن الابنودي

_______________

أيادي مصرية سمرا ليها في التمييز
ممدودة وسط الزئير بتكسّر البراويز
سطوع لصوت الجموع شوف مصر تحت الشمس
آن الآوان ترحلي يا دولة العواجيز
______________________ 
عواجيز شداد مسعورين
أكلوا بلادنا أكل.. ويشبهوا بعضهم نهم وخسة وشكل
طلع الشباب البديع قلبوا خريفها ربيع
وحققوا المعجزة.. صحّوا القتيل من القتل
______________________ 
اقتلني! قتلي ما هيعيد دولتك تاني
باكتب بدمي حياة تانية لأوطاني
دمي ده ولّا الربيع؟ الاتنين بلون أخضر
وبابتسم من سعادتي ولّا أحزاني؟
______________________
تحاولوا ما تحاولوا.. متشوفوا وطن غيره
سلبتوا دم الوطن وبشيمتوا من خيره
أحلامنا.. بكرانا.. أصغر ضحكة على شفة
شوفتوشي صياد ياخلق بيقتله طيره؟
______________________
السوس بينخر وسارح تحت إشرافك
فرحان بهم كنت وشايلهم على اكتافك
وأما أهالينا من زرعوا وبنوا وصنعوا
كانوا مداس ليك ولولادك وأحلافك
 ______________________
ويامصر قام العليل رجعتله أنفاسه
وباس جبين الوطن.. مال الوطن باسه
من قبل موته بيوم صحوه أولاده
من كان سبب علّته محبته لناسه
______________________
الثورة فيضان قديم محبوس ماشافوش زول
الثورة لو جت ماتبنش في كلام أو قول
تقلب وتعتل في سرية
تفور في القلب وتنغزل فتلة فتلة في ضمير النول
______________________
متخافش على مصر يابا.. مصر محروسة
حتى من التهمة دي اللي فينا مدسوسة
ولو انتا أبوها بصحيح وخايف عليها قوي
تركتها ليه بدن بتنخره السوسة؟!
______________________
وبيسرقوك يالوطن قدامنا عيني عينك
ينده بقوة الوطن ويقولي: قوم.. فينك؟!
ضحكت علينا الكتب.. بعدت بنا عنك
لولا ولادنا اللى قاموا يسددوا دينك
______________________
لكن خلاص ياوطن صحيت جموع الخلق
قبضوا على الشمس بإديهم وقالوا لأ
من المستحيل يفرطوا عُقد الوطن تاني
والكدب تاني محال يلبس قناع الحق
______________________
بكل حب الحياة خوَّط في دم أخوك
قول إنت مين للي باعوا حلمنا وباعوك.. أهانوك وذلّوك
ولعبوا قمار بأحلامك
نيران هتافك تحرر صاحبك الممسوك
______________________ 
يرجع لها صوتها.. مصر تعود ملامحها
تاخد مكانها القديم والكون يصالحها
عشرات سنين تسكنوا بالكدب في عروقنا؟
والدنيا متقدمة ومصر مطرحها
______________________
كتبتوا أول سطور في صفحة الثورة
وهما عُلما وخٌبرا مِداورة ومناورة
وقعتوا فرعون هرب من قلب تمثاله
لكن جيوشه مازالوا يحلمه ببكره
______________________ 
صباح حقيقي.. ودرس جديد قوي في الرفض
أتاري للشمس صوت.. وأتاري للأرض نبض
تاني معاكم رجعنا نحب كلمة مصر
تاني معاكم رجعنا نحب ضحكة بعض
______________________
مين كان يقول ابننا يطلع بنا من نفق
دي صرخة ولّا غنا؟ وده دم ولّا شفق؟
أتاريها حاجة بسيطة الثورة ياخوانّا
مين اللي شافها كده؟ مين أول اللي بدأ؟
______________________ 
مش دول شبابنا اللي قالوا كرهوا أوطانهم؟!
ولبسنا توب الحداد وبعدنا قوي عنهم؟!
همّا اللي قاموا النهارده يشعلوا الثورة
ويصنّفوا الخلق مين عانهم ومين خانهم
______________________ 
يادي الميدان اللي حضن الفكرة وصهرها
يادي الميدان اللي فتن الخلق وسحرها
يادي الميدان اللي غاب اسمه كتير عنه وصبرْها
ما بين عباد عاشقة وعباد كارهة
______________________
شباب.. كإن الميدان أهله وعنوانه
ولا في الميدان نسكافيه ولا كابتشينو
خدوده عرفوا جمال النوم على الأسفلت
والموت عارفهم قوي وهمّا عارفينه
______________________لا الظلم هين يا ناس ولا الشباب قاصر
مهما حاصرتوا الميدان عمره ما يتحاصر
فكرتني يالميدان بزمان وسحر زمان
كرتني بأغلى أيام في زمن ناصر
______________________
شايل حياتك على كفّك.. صغير السن
ليل بعد يوم المعاناة وإنت مش بتئن
جمل المحامل وانت غض
باتعجب إمتى عرفت النضال إسمحلي حاجة تجنّ
______________________
أتاريك جميل ياوطن مازلت وهاتبقى
زال الضباب وانفجرت بأعلى صوت.. لأه
حرضتنا نبتسم ودفعت إنت الحساب
وبنبتسم بس بسمة طالعة بمشقة
______________________

فينك يا صبح الكرامة الّا البشر هانوا
وأهل مصر الأصيلة إتخانوا واتهانوا
بنشتري العزة تاني والثمن غالي
فتح الوطن للجميع قلبه وأحضانه
______________________

الثورة فيض الأمل وغنوة الثوار
الليل إذا خانه لونه يتقلب لنهار
ضج الضجيج بالنِدا إصحى يافجر الناس
فينك ياصوت الغلابة وضحكة الأنفار؟
______________________
واحنا وراهم أساتذة خايبة تتعلم
إزاي نحب الوطن وإمتى نتكلم
طال الصدأ قلبنا ويأسنا من فتحه
قلب الوطن قبلكم كان خاوِ ومضلّم
______________________
أولنا في الجولة. لسّه جولة ورا جولة
ده سوس بينخر يابويا في جسد دولة
أيوة الملك صار كتابة
إنما أبدا لو غفلت عينّا لحظة هيقلبوا العملة
_______________________
لكن خوفي مازال جوة الفؤاد يكْبِش
خوف اللي ساكن شقوق القلب ومعشش
يقوللي مش راح يسيبه
ولسه هيقبّوا وهيلاقولهم سكك وبِبان متتردش
________________________
وحاسبوا قوي من الديابة اللي في وسطيكم
وإلّا تبقى الخيانة منّكم فيكم
الضحكة عالبُق بس الرك عالنيات
فيهم عدوِّين أشد من اللي حواليكم

______________________

Alexandria 11022011

___________

اسكندرية حبيبتي 

____________________

My Beloved Alexandria

:)

11022011

الحمد لله

أول خطوة على طريق الاصلاح تمت 

__________________

اسلمي يامصر  انني الفدا

ذي يدي إن مدت الدنيا يدا

أبدا لن تستكيني أبدا

انني أبغي مع اليوم غدا

ومعي قلبي وعزمي للجهاد

ولقلبي انتي بعد الدين دين

_____________

لك يا مصر السلامة

وسلاما يا بلادي

إن رما الدهر سهامه

اتقيها بفؤادي

واسلمي في كل حين

_____________

أنا مصري بناني من بنا

هرم الدهر الذي اعيا الفنا

وقفة الاهرام فيما بيننا

لصلوف الدهر وقفتي

في دفاعي وجهادي للبلاد

لا أميل لا أمل لا ألين

_____________

لك يا مصر السلامة

وسلاما يا بلادي

إن رما الدهر سهامه

اتقيها بفؤادي

واسلمي في كل حين

_____________

ويك يا من رام تقييد الفلك

أي نجم في السما يخضع لك

وطن حر سما لا تمتلك

والفتى الحر بأفقه ملك

لا عدا يا أرض مصر فيك عاد

اننا دون حماكي أجمعين

_____________

لك يا مصر السلامة

وسلاما يا بلادي

إن رما الدهر سهامه

اتقيها بفؤادي

واسلمي في كل حين

_____________

للعلا أبناء مصر للعلا

وبمصر شرفوا المستقبل

وفدا لمصرنا الدنيا فلا

نضع الأوطان الا أولا

جانبي الأيسر قلبه الفؤاد

وبلادي هي لي قلبي اليمين

_____________

لك يا مصر السلامة

وسلاما يا بلادي

إن رما الدهر سهامه

اتقيها بفؤادي

واسلمي في كل حين
_______________


اقتراح بتعديل جزء من النشيد ليتناسب مع أفعال الرئيس المخلوع
 ليصبح كالآتي:

لكي يا مصر السلامة وسلاما يا بلادي...
إن رمى حسني سهامه..نديهاله في الاجندة..
واسلمي من كل سيس

مش محتاجة

_____________

مش محتاجة كلام

_____________

صورة اليوم

بكل لغات العالم...ارحل..ارحل..انصرف...اشتاتا..اشتوت

يا لزج

________________________________________

الخلطة السحرية... خلطة وندمان عليها

ده المصري يا حسني

تيجي تصيده يصيدك

البس بقى

وائل غنيم

____________________________

قد أسمعت إن ناديت حيا ولكن لا حياة لمن تنادي

____________________________




توضيح: الكلام ده مش مقصود بيه الناس.. مقصود بيه واحد بس...المسئول الأول و الأخير عن الدم اللي سال والخراب اللي بقاله 30 سنه...

شكرا للدبلوماسيين

وكأنهم أبو الا ان يصيروا أقذر من بوليس مبارك 

كنتكني يا معلم

الحمد لله...الخونة العملاء اتفضحوا

اتفرجوا عالكنتاكي

معلهش الأجندات معرفناش نصورها بس الفيديو الجاي إن شاء الله

بيكيا

طيار سابق

رئيس لمدة 30 سنة

استعمال شعب صبور

شعبه يتخلص منه لفقدانه الشرعية

بدم بارد

الفيديو ده كنت حاحطه في البوست بتاع الشهداء..بس ماقدرتش...لازمله بوست لوحده

ده مش مجرد حزن على  شهيد..ده دليل على خسة ووضاعة نظام مبارك

مش حتكلم ولا حفتح بقي

لا تعليق

ورد مصر

تحديث-2 : 6-2-2011: الشهيد بلال سالم 10 سنوات..من شهداء رفح

اضغط للذهاب للصورة

____________________________________________________
تحديث 6-2-2011 : نقلا عن هبة الخولي:

  ﻫﻨﺎﻙ ﻣﻦ ﻳﻨﺎﺿﻠﻮﻥ ﻣﻦ ﺍﺟﻞ ﺍﻟﺘﺤﺮﺭ ﻣﻦ ﺍﻟﻌﺒﻮﺩﻳﺔ . . . ﻭﻫﻨﺎﻙ ﻣﻦ ﻳﻄﺎﻟﺒﻮﻥ ﺑﺘﺤﺴﻴﻦ ﺷﺮﻭﻁ ﺍﻟﻌﺒﻮﺩﻳﺔ

____________________________________________

هم دول العملاء الخونة اللي باعوا حياتهم عشان وجبة من كنتاكي...

فليلحق العار بكل من حاول تثبيط عزيمتهم 

و  ليلعن التاريخ كل من ساهم في تشويه صورتهم 

شعب بأكمله مدين لهم بحريته وكرامته 

ولادي وولادك لما يفخروا بكونهم مصريين, حيكون دم الشهداء دول السبب...

مش عشان مبارك صاحب الضربة الجوية الأولى وأبو المصريين

مبارك بدأ حياته بشرف وها هو ينهيها بعار سيلاحق نسله إلى الأبد إن شاء الله...

ولكن هولاء بدأوا حياتهم  بمحاولات مستميتة لتنشئتهم كفشلة وسطحيين ملهيين بتوافه الأمور

تسابق الجميع للتفنن في وصفهم..شباب الانترنت والفيسبوك والبنطلون الساقط والجيل والماكدونالدز..

شباب  سيس...بياكل سوسيس...

معظمهم  مالوش أي انتماء سياسي..لأنه ما يسمعش عن السياسة ومايعرفش إيه هي الممارسة السياسية..

مش ذنبهم...كله اتربى إن السياسة دي بتاعة الكبار... واحنا لازم نركز في دراستنا ونخلص ولما نبقى كبار  ومسئولين يبقى يحلها حلال

تسأل ابوك شفت المظاهرة؟ ولا مثلا تقول أنا نازل المظاهرة كمان كام يوم عشان فلسطين..يكون إيه رده؟

يابني أمشي جنب الحيط...احنا مش حمل الكلام ده.. هو أنا بدفع دم قلبي و باقطع من لحمي الحي عشان تتعلم ولا تبقى مظاهرجي؟

ولما خلص الواد..حاجة من اتنين..إما انه مالقاش شغل وقعد بياخد مصروف من ابوه  وعينه مكسورة ولو فكر يفتح بقه, حيتقاله لما تبقى راجل وبتصرف على نفسك ابقى اتكلم...
طب واللي اشتغل؟ فكر افتح بقك وحتلاقي اللي بيقولك  يابني اسكت أحسن تاخد تقرير سري وتبات في الشارع..هو حد لاقي شغل؟ حتضيع الفرصة  والمرتب عشان تعمل فيها وطني واللي حواليك يركب عليك؟

طب وبعدين؟

تعاقبت الحكومات , واحدة تلو الاخرى...والهدف واحد...خدمة شخص  واستجداء عطفه للبقاء على كراسيهم

تعليم  تم تخريبه...خدمات صحية معدومه..مرافق؟ عند أم مشمش....... مواصلات؟ يا ضحكك يا حكومة

الناس كلها عارفة إن فيه حاجة غلط..حتى اللي مش عارف إيه هي... برضه متأكد انه فيه حاجة غلط

الشباب دول  هما اللي عرفوا أي حد عنده التباس  فين بالضبط موضع الخلل... مين السبب في الوحل اللي عايشين فيه..

مسلم ومسيحي؟ صلاة جمعة وقداس في نفس المكان

الرصاص مش بيفرق بين  مسلم ومسيحي

بابا  صاحب شركة ولا موظف ولا فلاح ولا حتى بواب

الرصاص مش بيفرق

ساقط ابتدائية ولا معاك ماجستير؟

الرصاص مش بيفرق

كل الكلام اللي قلته فوق ده ارميه من الشباك..ده حشو فارغ

عايز الخلاصة؟ بص عالصورة اللي تحت..

دول كام واحد من اجمالي 300 شهيد سقطوا برصاص الكلبوشومه ومولوتوفه

بص في عين كل واحد منهم 

تفتكر لو ابوك أو اخوك أو ابنك  صورته هنا حتعمل إيه؟

حتعمل  إيه؟

 حترضى بتهدئة؟

دم  دول يتساب 7 شهور عشان    مبارك مايبقاش اتخلع؟

شايفين دم ولادكم رخيص؟

والله العظيم  مفيش قصاص  كفاية فيهم 

مفيش قصاص كفاية

مفيش قصاص كفاية

ومفيش كلام كفاية  يقول فيهم اللي يستحقوه

الله يرحمكم 

وتشوفوا مصر بتنضف  من مكانكم دلوقتي

الله يرحمكم جميعا 

الشهيد بلال سالم...10 سنوات

الاجندة لا تزال في جيبي

خلاص.... من يوم الثلاثاء 25 يناير والاحرار صامدين...

بوليس؟ بخ

أمن مركزي؟ بخين

أمن دولة؟ كان غيركم اشطر

بلطجية؟ عند امه يا ادهم

خيل وجمال ومولوتوف؟ فاكرين نفسكم بتحاربوا المشركين؟ ياخي..لفظ بذيء

المهم...الناس صبرت, واستحملت...وحتى لما فئة من الناس فجأة اكتشفوا إن مبارك يبقى ابوهم الحقيقي وانهم ولاد حرام والدموع نزلت كالانهار...الناس ماكسكستش... الكسكسة يعني ضياع كل شيء..كل الجهد..الاحلام...الحرية...

وكله الا الحرية...اللي يذوق طعم الحرية مرة, صعب قوي يتنازل عنها...صعب قوي...

ميدان التحرير اللي بقى جبهة الامل رقم 1,  بالاضافة لكل شوارع مصر اللي الناس بتتظاهر فيها...

ميدان التحرير استحق اسمه... ومهما افتى المنبطحون, اللي بتحصل دي ثورة شعبية..مش فئوية..مش ثورة جياع...الشباب اللي موجود من كل الطبقات... من كل الاعمار...من كل الاديان...

محدش شاف واحد مسلم بيروح بعيد عن واحد مسيحي ويقوله حرام الإختلاط , في كل الزحمة دي محدش سمع عن تحرش جنسي (اللهم الا من كلاب مبارك أثناء الهجمات) هه ......

في كل الزنقة دي, المصري غزل برجل حمار... كل حاجة استعملها عشان يعملها خوذة لحمايته...من أول الزجاجات البلاستيكية مرورا بالكرتون وانتهاء بالجردل  والحلة وقصعة الاسمنت :) يخرب بيت دماغك يا شيخ... 

حتى اللافتات والشعارات برضه مصري من الدرجة الاولى.... "مبارك طير انت" و "ارحل بقى ايدي وجعتني...من شيل اللافتة"  وانتهاء باللي رفع اللافتة بالمقلوب, ولما سألوه ليه, قال بقالي أسبوع رافعها عدل ما مشاش, قلت  اقلبها يمكن يفهم كده....

اخواننا بتوع جمعة الفتنة ونحمي مصر والشعارات اللي فعلا تضحك, إن دي بلد الريس العظيم واحنا اولاده...صباح الإحساس باليتم..بنتلزق في الناس عشان يتبنونا...فاكرين يعني انهم لو كسكسوا دلوقتي الراجل حيبقى اخر حلاوة....  حد عمره شاف  كلب جريح؟  مش حيرحم حد! وديه مش بلده...اللي يقتل اهله وناسه بالطريقة دي مايبقاش مصري...ولا يبقى إنسان...

نيرون وهتلر وموسوليني وجنكيز خان واتيلة  وكل السفاحين في انتظارك تنور معاهم مزبلة التاريخ ...اذهب غير مأسوف عليك....وسيطالك القصاص اينما هربت... 

ومن مزنقي هذا بعيد جسديا عن الاحداث على بعد كام ألف ميل...زيي زي أي مغترب ما عرفش انه مصري غير لما سابها... مقدرش غير إني اطلع الاجندة بتاعتي اللي تثبت إني عميل واسعى بكل جهدي لزعزعة الإستقرار  والعبث بالمقدرات والمكسرات وكافة اصناف الياميش جمعاء...

الاجندة لا تزال في جيبي

كلام عمر عفيفي على الجزيرة يوم 30-1-2011

عالجزيرة الآن..العقيد عمر عفيفي و د.لؤي ديب  رئيس الشبكة الدولية للمش عارف إيه من النرويج  يؤكدوا وصول اسلحة قادمة على متن طائرتين من إسرائيل  لتزويد الداخلية المصرية  بها اسلحة قنص للتعامل مع المتظاهرين!!!

للي مافهمش...اسلحة قنص ....جاية للداخلية المصرية.... من إسرائيل 

احا ...دي اسمها خيانة عظمى

خيانة عظمى يا ولاد ... الكلب

خيانة عظمى

خيانة عظمى

لو أي حاجة من دول ثبت استخدامها تبقى خيانة عظمى

ولو ماحصلش...برضه...القصاص يظل المطلب الرئيسي...

القصاص ل80 مليون مصري طلع دينهم في ازهى عصور الحرية!

يسقط يسقط حسني مبارك

مش عايزينه

ارحل

غور

وفوق كل شيء : "الشعب يريد اسقاط النظام" .ه

للتاريخ ليس الا

تحديث: 27-1-2011  بالاضافة لكل اللي ذكرتهم,  نسيت أذكر الاستاذ محمد عبد القدوس, واللي اتعمل فيه... شايفين الصورة دي؟ 5 جتت دواليب بيفتروا عالراجل...هي دي المرجلة؟ اتفوا عالبطن اللي شالتكم, طب سيبكم من إن الراجل مقامه إيه في الصحافة ولا اصله إيه ولا اخلاقه إيه...مخطرش على بال حد فيكم يا خنازير إن ده ابن بلدكم؟ 5 حلاليف تسحلوا الراجل بالشكل ده؟ اسفوخس واتفوا عليكم يا خنازير! انتم ماتستاهلوش غير جل احتقار...  حسبي الله ونعم الوكيل...حسبي الله ونعم الوكيل حسبي الله ونعم الوكيل!
أنا آسف على نشر الصورة, بس عشان اللي لسه في باله إن دول بشر يفكر تاني ويراجع نفسه





بلال فضل... هاه؟  لا بجد.. مش حقعد اوصفه...الراجل  ده زي ابراهيم عيسى, حطوا كلامهم على الورق ونفذوا في الشارع... ما قعدوش في برج عاجي يتفرجوا وبعد كده يعملوا ابطال ومناضلين...

اكبر تحية من قلبي لكما... شرف للصحافة   انتماؤكم لها  

أنا ما جبتش سيرة نوارة نجم عشان مفروغ منها يعني... نوارة  حتكون فين؟ بتعمل مانيكير؟ أكيد في الشارع...

برضه وائل قنديل  اللي نزل وهتف و شارك, مش معارض الكتروني...

عمرو واكد اللي نزل الشارع واتقبض على اخوه , برضه بعد النوت اللي كان حاططها في الفيسبوك الناس انتظرت فعل مش كلام وبس, وعمرو طلع قدها

الاسامي النضيفة كتير.... 

الاسامي النضيفة  تعرفها لما تشوف اثر مظاهرة امبارح على وشها... عين حمرا من دخان القنابل, أو  كدمة أو جرح أو دم سال من شومة أمن, أو كهربة عصاية أو سكينة بلطجي أو توكة حزام مخبر, أو حتى رصاص حي  .... دول المصريين اللي ما اكتفوش بالهتاف على تويتر أو فيس بوك و نزلوا شاركوا...

انتم اشرف  من في الوطن...انتم اصحابه..

نيجي لمزبلة التاريخ  اللي اتملت ودلدقت, مين ولا مين ولا مين..... أنا حاختصرهم عشان ما يستاهلوش  بصراحة!  كل شباب اللي كان قاعد في ستاربكس وسيلانترو وكوستا ومخنوقين من الهمج اللي بيزعقوا في الشارع  عشان مش حيعرقوا يكملوا الخروجة بسببهم . لسه كنت حاكتب عن رؤساء الاحزاب الكرتونية اللي بتتاخد على جنب...بس خسارة فيهم فعلا..


المهم,  ده مقال بلال فضل النهارده في المصلحجي اليوم , وبرضه ده نص المقال بغرض الاحتفاظ ليس الا

رسالة بأمل الوصول   بقلم   بلال فضل    ٢٦/ ١/ ٢٠١١

ابنتى الحبيبة: إزىّ حالك. أكتب إليك هذه الرسالة وأنت تأكلين الآن رز باللبن والقشطة والمكسرات مع الملايكة، بعد أن قضينا يوما جميلا حافلا باللعب والضحك والجرى والمرجحة والحواديت التى لم تفهمى منها شيئا لكنك بكل جدعنة تحملتِ حماسى المبالغ فيه وأنا ألعب دور الأب الحكّاء، فقررتِ مشكورة أن تلعبى دور البنت المنبهرة بحكايات أب رأى أنه من العبث أن يحكى لابنته عن الشاطر حسن وأمنا الغولة فى زمن يسوده الشطار والعيّارون وسارقو الأحلام، وتتوارى أمنا الغولة خوفا من غيلان القصور الحاكمة والممولة والراعية للحكم، فقرر أن يحكى لابنته عن أحلامه فى أن تعيش يوما ما فى بلاد أقل سوءاً من التى عاش هو فيها. الغريب يا ابنتى أننى وأنا أحكى لك عن هذه البلاد التى حلمت بها أنا والأجيال التى سبقتنى كنت أرى فى عينيكِ حزنا رهيبا جعلنى أشك للحظة أنك تفهمين ما كنت أقصده، ربما التقطتِ حزنى بفطرتك الذكية وربما أنا الذى ظننت ذلك مبالغا فى قدراتك كعادة الآباء، لكننى شعرت أننى فى حاجة لأن أفسر لك سر ذلك الحزن الذى تملكنى وأنا أحدثك، فقررت أن أسجل ذلك على الورق لعلنا عندما تكبرين نقرؤه سويا ونضحك على عبط أبيك الذى لم يكن يعلم أن الأحوال ستنصلح، أو لعلنا نقرؤه سويا ونبكى على حال هذه البلاد التى تعشق أن تصبح على الذى باتت عليه، وربما لا أكون معك أساسا وأنت تقرئين هذا الكلام فأكون قد حاولت أن أجيبك عن سؤال يواجهنى كثيرا هذه الأيام، ولعله سيواجهك عندما تكبرين، هذا السؤال المفزع الذى يطاردنى كثيرا يا ابنتى هو ما الذى تريده بالضبط؟ ولماذا تكتب كل ما تكتبه؟  ولماذا لم ترض بالكثير الذى رزقك به الله، وقررت أن تتمرد وتلابط وتسوق العوج على الذين عاثوا فى الأرض فسادا وموالسة وزيفا وظلما؟ فأخشى ما أخشاه أن يصور لك أحد أن أباكِ كان مجنونا أو باحثا عن بطولة أو جاريا وراء وهم. وأنا يا ابنتى أقسم لك بالذى أنشأك فى أحسن صورة أننى لم أكن مجنونا أو بطلا أو موهوما. أنا كنت أنا، بأسئلتى الكثيرة وحيرتى وشغبى وكراهيتى للسير فى القطيع وحبى العارم للحياة، كل الحكاية أننى كنت أظن أن القلم لعبة لطيفة كما تظنين أنت الآن وأنت تلعبين بالأقلام التى أحضرها لك، لكننى تعلمت أن القلم لعنة تحرق صاحبها إذا لم يحمل أمانته التى اختار أن يحملها ظلوما جهولا. أنا يا ابنتى كنت واحدا من ملايين غيرى عشنا نحلم فقط ببلاد أقل سوءا، بلاد حقيقية، ليست موجودة فقط فى أحلام الشعراء وخيالات الروائيين، بالعكس، البلاد التى نريدها كانت على أيامنا موجودة على خريطة العالم يتمتع بها من لا يدينون بديننا ولا يتكلمون بلغتنا ولا يدّعون مثلنا طيلة الوقت أن لديهم أخلاقا وتراثا وقيما وتقاليد وهوية وحضارة. كنا نريد بلادا نعلم كيف يأتى حاكمها ومتى يرحل ولا نعلم من سيخلفه مسبقا، بل نكون بحاجة لأن نفكر جيدا قبل أن نقرر من سيخلفه. كنا نريد بلادا نعلم من يحكمنا فيها، هل هو الحاكم أم ابنه أم أصدقاء ابنه أم قوى غامضة لا يعلمها إلا الله. كنا نريد بلاداً لا يفتش فى ضمائرنا فيها إلا الله ولايجرؤ أحد فيها أن يصادر على تفكيرنا ولا على حريتنا ولا على مشاعرنا. كنا نريد بلاداً يأكل المواطن فاكهتها بشغف لا يشوبه قلق من المرض الخبيث، ويمتنع عن الإكثار من أكل اللحم لأن كثرته مضرة لا لأن كثرته مستحيلة. كنا نريد بلاداً نعلم لماذا تحارب ولماذا تسالم ولماذا ترفع صوتها بين الأمم ولماذا تخفضه، بلاداً تنحنى للعواصف دون أن تنبطح، وتلعب كل الأدوار فى السياسة الدولية إلا دور المحلل، كنا نريد بلادا لا تخنقنا بأوهام الريادة والسيادة والصدارة وهى تسير فى ذيل ركب الحضارة، كنا نريد بلادا لا يحتاج المحبون فيها إلى التخفى، ولا الحالمون بالجنس إلى الاغتصاب، ولا المنزلقون فى الزلات إلى اختبار الـ«دى إن إيه». كنا نريد بلادا يتمتع فيها الغنى بغناه دون أن يسرقه مسؤول أو يفرض عليه «الفردة» صاحب نفوذ أو يسرقه جابى ضرائب، بلادا فقرها ممكن الاحتمال، يحلم فيها الفقير بخروجه من فقره دون أن يتهمه الناس بأنه موهوم لا يدرك أن فقره سيسحقه وأنه هالك لا محالة. كنا نريد بلادا نعلم لماذا يتعرض الإنسان فيها للسجن وكيف يقضى ليلته فى السجن وماذا يأكل وكم مرة سيرى أهله وذويه ومتى سيخرج وما الذى سيفعله بعد أن يخرج. كنا نريد بلادا لا يُضرَب كُتّابها فى الشوارع ولا يختفون فى ظروف غامضة ولا يختارون تعرية ضمائرهم وأقلامهم خوفا من أن يجدوا أنفسهم عراة فى المقطم. كنا نريد بلاداً توصل الكهرباء إلى بيوت مواطنيها لا إلى مؤخراتهم، بلاداً تروى عطش أهلها بالمياه النقية ولا تغرقهم فى براميل المياه حتى يعترفوا بجرم لم يرتكبوه، كنا نريد بلادا نموت فيها لأن الله وحده أراد لنا ذلك، وليس لأن لدينا مستشفيات بها أطباء بلا ضمير، وعمارات بناها مقاولون بلا إيمان ورخّصها مهندسون بلا ذمة، ومسارح لا مخارج للطوارئ بها، وطرقا تعبر بسالكيها إلى الموت، وفقرا «دكر» يدفع الناس لقتل أنفسهم عندما يعجزون عن قتله. كنا نحلم ببلاد لا نبكى عندما نغنى لها، لا نخاف عندما نشكو منها، لا يراودنا الشك فى مصيرها، ونموت لأى سبب إلا القلق على مستقبل أبنائنا فيها. كنا نريد بلادا تشجعنا على حبها. .. لكننا يا ابنتى حيل بيننا وبين ما نريد ونشتهى تماما كما فُعِل بأسلافنا من الحالمين فى هذه البلاد الظالم حكامها لأهلها والظالم أهلها لأنفسهم ولبعضهم البعض، ولست أدرى فى هذه اللحظة التى أكتب لك فيها هل نرى يوما ما نريد أم نموت مثل أسلافنا قبل أن نرى ما نريد، وما كنا نريده كما ترين لم يكن وهما أو مستحيلا أو جنونا أو عبثا، بل كان حلما قابلا للتحقق لكن الوجوه الكريهة التى كانت سائدة فى زماننا لم تكن ترى ذلك ولا تريده، ولست أدرى هل سيكون فى الزمن الذى تكبرين فيه وتصبحين قادرة على فهم ما أكتبه لك الآن وجوه كريهة تمنعك أنت وجيلك من رؤية ما تريدونه، أرجو من الله ألا يحدث ذلك وأن تكونوا أسعد حظا منا، فتشهدوا لأول مرة تغييرا حقيقيا فى هذه البلاد التى ظل العالم كله يتغير وهى تتحايل على التغيير بألف شكل وشكل، تغير جلدها وشكلها أحيانا لكنها لم تغير أبدا جوهرها. سأشعر بسعادة يا ابنتى لو كنت إلى جوارك بعد عشرين عاما ورأيتك وأنت تقرئين كلامى هذا وتسخرين منى ومن جيلى لأننا كنا نحلم بأشياء هى بالنسبة لكم بديهيات لا ترقى إلى أن تكون أحلاما. وسأشعر بالرضا لو جئتِ إلى قبرى وقرأتِ لى وعلىّ الفاتحة ثم قلتِ لى إنك الآن ترين ما كنت أريد. ليس ذلك بكثير على الله يا ابنتى فالله يفعل ما يريد.. فقط عندما يسعى عباده لأن يعيشوا فى بلاد أقل سوءا. belalfadl@hotmail.com

إلى عمو المخبر

طب بالمناسبة دي, برضه احب افكر الناس بكام حكمة لينا وللزمن, وبالذات عمو المخبر اللي مقعدينه يلم اسامي المدونات واصحابها ويفبرك تقارير علاوله ...

- طائرة الرئاسة لا تسع الا أفراد الرئيس 

- للحكام العرب: البيت الابيض مش حينفعكم في اليوم الأسود

- للعادلي: حضرتك حتبقى أول  واحد يتم التضحية بيه  علشان الريس يعيش ..يعني لامؤاخذة كبش  فدا

-  لكل واحد في مؤسسة تأمين الرئاسة والحكم : افتكروا انكم معانا في نفس المركب ساعة الطيارة ماتروح السعودية...حنبقى مع بعضينا..مصلحتنا واحدة

- ونداء حقيقي لكل فرد أمن: "قبل ما تمد ايدك بشومة  تضرب بيها واحد بيرفع صوته لطلب حقه أو تدوس على زناد تطلع منه طلقة مطاطية أو ذخيرة حية في قلب واحد رفض المهانة والذل في بلده, افتكر إن ممكن زميلك اللي جنبك يكون في نفس اللحظة بيعمل نفس الكلام في واحد من أفراد عيلتك.. اخوك, ابن عمك, ابنك, ابن منطقتك, صاحبك, زميل دراسة, جارك, أختك , امك, مراتك, بنتك...

و أنا آسف عالتشبيه ده, بس خيل الحكومة لما بتقع, مش بيحموها..... وانتم أغلى من خيل, انتم اهلنا واخواتنا...ومشكلة الشعب مش معاكم,  مشكلة الشعب مع اللي سلطوكم عليهم ... اللي بيستعملوكم كقفازات طبية لمنع دمنا من طرطشة ايديهم...ولما تتقطع, حيقلعوك ويجيبوا غيرك .. وهكذا

يارب, اللهم انا دعوناك كما أمرتنا, فاستجب لنا كما وعدتنا

أنت قلتلنا في كتابك " وأعدوا لهم ماستطعتم .." , واحنا لبينا ونفذنا 

ثبتهم وانصرهم وانصرنا يارب

نصرك الذي وعدت

نصرك الذي وعدت

هو ده المصري

قصاد مدرعة بطوله...

ولا دروع ولا سلاح

مصري بيزود عن أرضه

ويعرفهم معنى الكفاح

الفيديو بيتكلم وبيقول أحلى كلام

وبالمرة... اتفرجوا على نشيدنا الوطني القديم

اسلمي يا مصر

أبانا الذي مش عارفين لسه إيه حكايته

هاه يا ميكو؟ 

رايح جده ولا تل أبيب؟

 لو هنا حتعمل عمره, ولو هنا حتعمل حج عند حائط المبكى... 

شوف اللي يريحك...

 المهم قصر ولخص... 

الناس وراها أشغال...

وحتى كمان مش محتاج طيار يسوق طيارتك, أنت راجل خبرة ونسر قديم...

ياللا...حسني...طير أنت

ولاد بلدي

النهارده يومنا... 

النهارده عيدنا

النهارده....مش عارف اقول إيه

الله أكبر في كل مكان

الله أكبر

الله أكبر

دي شوية فيديوهات  خدتها  من  امام السفارة المصرية في لندن من وقائع مظاهرة اليوم

العدد مش كبير,  وشكرا للي طنش  واللي قضاها في   ادجوير رود يشيش...

برضه, كل ده مساندة مش أكتر, الرجالة في مصر بيعملوا الواجب...واحنا قاعدين هنا في الغربة مش عارفين نعمل حاجة للبلد 

المهم, الفيديوهات اهيه :

يا رب

انسى اسمك, انسى لونك, انسى سنك, انسى خانة الديانة في بطاقتك...أنت النهارده مصري, صفتك الوحيدة مصري, نازل تطالب بحقك 
اليوم يوم فرحة إن شاء الله


يادوب فاضل 5 دقايق واليوم يبدأ عندي...
لازم أصحى كمان 6 ساعات عشان اخد المشوار لحد لندن وأروح الشغل بدري عشان أعرف اخلع ساعة المظاهرة
كل اللي جاي على بالي دلوقتي لحظة كل جيلي شافها...
يمكن كانت عبيطة حبتين بس الفكرة مش في اللحظة,
الفكرة في الشعور اللي كان عند حاجة وسبعين مليون مصري  ساعتها...
صيف 1990...في ايطاليا...
أول ماتش لمصر مع هولندا...
الشوط التاني ومصر خسرانة واحد-صفر
وهوبا.. حسام يتكعبل والحكم يصفر وضربة جزاء...


لحد دلوقتي فاكر الكلام..
مش عشان تاريخي... بس عشان كانت لحظة حلوة للمصريين كلهم...
مجدي عبد الغني  وضربة جزاء...
وهوب...هووب...
وجووووووووووووون


هدف التعادل للمصريين
في الدقيقة 40
في الدقيقة 38 من الشوط التاني...


معلش استحملوني, أنا قلبت معايا على هبل شوية... بس برضه


يا رب

ثورة الرمان

سبق وأن كتبت عن عدم اقتناعي بيوم 25 يناير ك"ثورة" وذلك لعدم تشويه  معنى الكلمة في اذهان الناس حال عدم نجاحها بالقدر المرجو,

 ولكن........بعد  كل مارأيت من جهود لانجاح اليوم, شعرت  بوجوب المشاركة, مهما حدث.....المشاركة لمجرد المشاركة, لحشد اعداد , لأن العدد الكبير سوف يشجع كل من توجس من بطش الامن.... 

خلاص كده..

كفاية نحوي...

الكلمتين اللي حيلتي خلصوا.... 

اديلي في الشعبي..الكلام السلس الشيعبي بتاعنا...الواحد بينطق كزكرتين بالضالين.... تيجي أنت تقولي توجس واقشعرت ابدانهم؟  

ماشي يابن عمي...

25 يناير مش ضروري يبقى يوم ثورة, و مانحملش اليوم فوق طاقته... الخروج بكرة حيبقى عشان اللي خايف مايخافش...اللي متلجلج, يتنحرر لما يلاقي كله نزل وينزل معاهم عملا بواحد من المبادئ التالية: " يا نعيش عيشة لوكس, يا نركب كلنا البوكس", أو "ضربوا الاعور على عينه .." أو....وده المحبب لنفسي جدا ومنطقي الخاص في التعامل مع الامور المستعصية, ألا وهو " ياللا يا رمان" ...

لو ثورة تونس كانت ثورة الياسمين,  أنا عايزها في مصر تبقى ثورة الرمان...

وبرضه, بكره مش نهاية المطاف... 

بكره بداية...

الناس تنزل بأعداد...

بكره ماجابش نتيجة؟ ننزل بعد بكره... بعد بعده... لحد ماييجي اليوم المنتظر....

البرادعي مش نازل؟  بذمتكم مش مكسوفين وانتم بتقولوا كده؟ 

البرادعي لو نزل الشارع حيبقى نفر زيه زيكم...اطلع فوق سطوح عمارة وبص كده وقابلني لو فرقت البرادعي من جميلة اسماعيل...

محدش حيقف يوزنه ويقولك ده مهم وده مش مهم.... 

كل واحد في الشارع في اليوم ده دوره زي دور البرادعي بالظبط ويمكن أكتر....

الاخوان مش نازلين؟

 هما مش نازلين كمؤسسة, بس نازلين كأفراد... زي ماشباب من الوفد و التجمع نازلين....

ومش بعيد نلاقي ناس من الحزن الوثني الظلمقراتي نازلين برضه... اينعم انضمامهم في حد ذاته يصمهم بالنفعية, بس برضه جزء من المجتمع اللي بقاله 30 سنه بيتضرب تحت الحزام...

اسمحولي اضرب مثال من الحياة, الجبل بيقع في الطبيعة بطريقة من اتنين... 

يا إما يضربه تسونامي يساويه بالارض.... 

أو سرسوب ميه صغنتت يفضل ينز عليه يوم ورا التاني ورا التالت لحد اليوم المليون, حيعمل شرخ والشرخ حيسرح... والنتيجة واحدة...

لو شبهنا ثورة تونس بتسونامي, مش شرط نبقى زيهم, ممكن نبقى سرسوب,...يعني في الحالتين الأمل موجود...واحنا نعمل اللي علينا, ولو ماشفناش النتيجة النهارده, اولادنا إن شاء الله حيشوفوها...

هما خايفين منكم أكتر ماانتم خايفين منهم! والله العظيم.... 

عشان انتم أصحاب حق.... انما هما عارفين انهم بيدفعوا عن واحد حيبيعهم في غمضة عين ويسافر السعودية يعمل عمرة مع بن علي...

بص عالخريطة اللي تحت دي, عارفها؟ 

دي خريطة وعلم بلدك...اللي ياما شافت وبرضه صامده...ياما تم احتلالها ونهبها, وبرضه بتدي.... وحتفضل برضه بعد احنا مانمشي.....

.ومصر مش نهاية المطاف... بعد مانحرر مصر لسه ورانا مسئوليات تانية... فلسطين على رأسها...ويتبعها العالم العربي بأكمله....

الحق معانا, والبلد بتاعتنا, والمستقبل لازم يجيلنا, وياللا يارمان

ياللا    يا   رمان